Presidente di Parlamento Marlon Sneek por a compronde for di Aruba Huis:
ORANJESTAD (AAN) Presidente di Parlamento, señor Marlon Sneek, den entrevista cu DIARIO a informa tocante biahenan cu Parlamento ta bay haci den luna di Mei, pero tambe a elabora encuanto vivienda pa nos studiantenan cu tin intencion di sigui nan estudio na Hulanda.
Actualmente ta preparando un biahe, cu lo tuma lugar na fin di e luna di Mei aki, y cu ta un Congreso di Merca riba e tema di impacto, y kico ta e temanan cu Parlamento di Aruba por hiba, cu por discuti dilanti e Senado Mericano.
Banda di esaki, den e di dos siman di Mei ta bay tin reunion di e Comision di Enseñanza, pa loke ta biahenan pafo di Aruba. Esaki ta te aworaki, loke a drenta como invitacion pa Parlamento di Aruba, Sneek a bisa.
Relaciona cu e temporada cu nos studiantenan cu ta caba scol avanza y tin intencion di sigui nan estudio afo, vooral Hulanda, e Parlamentario a indica cu locual a cuminza haci ta duna e studiante e posibilidad di haya su BSN number for di Aruba caba, pues cu no mester bay biba e dia ey pa por registra, pasobra esey ta facilita e studiante pa por registra of pone su mes riba lista pa por haya vivienda.
“Kiermen, e ta bay haya efecto di biaha; pero, mirando cu tin otro forma cu ta bay cuminza registra adelanta, pa por yega na remarca pa un cas, esaki lo bay yuda pasobra Hulanda ta bay keda cu e crisis di migrantenan cu, basa cu nan forma parti di Union Europeo, nan tin cu cumpli cu cierto cantidad di hende cu mester haya vivienda ora nan ta den un situacion unda nan ta bira desplaza, manera loke a pasa na Ukraine, por ehemplo, dus e reto ey ta keda. Pero, for di Aruba Huis, nos por a compronde cu tin trabaonan ta wordo haci pa nos studiantenan bin na remarca pa vivienda. Toch e ta keda un reto si, pasobra no ta studiante di Aruba so, pero di Curacao, Bonaire, y mundo henter ta purba di haya un lugar tambe riba e mercado aki, pa tin un cas”, Parlamentario Sneek a señala.
