Minister Glenbert Croes:
ORANJESTAD (AAN)-- “Henter comunidad ta na haltura cu nos a haci un esfuerzo na Washington y nos ta cautelosamente optimista di e esfuerzo ey cu ta andando”, Minister Glenbert Croes a bisa, den conferencia di prensa Dialuna.
E minister a reitera su gratitud na Minister Plenipotenciario na Washington, señora Joselyn Croes cu ta yudando den esaki, na henter e Embahada Hulandes na Washington, y e atencion y consideracionnan cu Departamentonan di Estado Mericano, di Tesoro y di Energia y gobierno Mericano ta dunando na e solicitud cu e mandatario a transmiti den e reunionnan.
Minister Croes a señala cu aworaki como follow up, gobierno di Aruba ta den e proceso di manda un nota diplomatico, tambe cu apoyo di gobierno di Hulanda pa haci e solicitud oficial. Tambe el a expresa su gratitud inmenso na Minister Presidente Evelyn Wever-Croes, cu durante e reunionnan na Peru a reuni cu Secretario di Estado Anthony Blinken, y a recalca na gobierno Mericano, con importante ta pa Aruba ricibi e apoyo na e solicitud aki, principalmente pa haya un “conform letter.
E mandatario a sigui bisa cu e HFO cu Aruba por haya for di Venezuela su perspectiva riba mercado ta, cu e descuento lo ta substancial y obviamente, miho e rebaho ta mas hopi por baha prijs di consumo di awa y coriente na Aruba.
“Nos ta compronde y nos ta sinti e dolor di nos pueblo, riba e reclamonan cu tin door di e cobranzanan di awa y coriente. No ta momentonan facil pa nos na Aruba”, minister Glenbert Croes a acentua.
El a agrega cu Web Aruba NV, riba iniciativa propio y tambe riba solicitud na nomber di Gobierno di Aruba, atravez di e director di Utilities a pidi pa e “service desk”. E help desk di Web y Elmar ta disponible, no solamente pa duna pueblo splicacion, pero check tambe si tin cosnan cu mester wordo coregi y tambe pa tene cuenta cu e capacidad di pago pa tur e famianan.
“Nos ta empeña pa haci tur nos maximo esfuerzo pa nos por logra bek baha prijs di awa y coriente. Mi no sa con e prijs di petroleo cu ta afecta e prijs di HFO a lanta awe, pero obviamente, ora cu bo weita desaroyonan atrobe di tension, entre Ukraine cu Rusia e no ta yuda e ambiente pa por logra un reduccion, relativamente stabil, pa nos por haya alivio pasobra e ta impacta e prijs di awa y coriente”, Minister Glenbert Croes a bisa.
