Pa keda safe y accesibel pa tur hende:
ORANJESTAD (AAN) – Na Archivo Nacional Aruba (ANA), a tuma lugar un conferencia di prensa, den cual a hiba palabra e escritor y historiador Adolfo “Dufi” Kock.
Dufi Kock ta masha contento y orguyoso di ta un historiador, pasobra asina e ta contribui continuamente, cu temanan tocante e historia di Aruba, Lago, Segunda Guera Mundial, y for di aña 1997 cu el a stop di traha, el a dicidi di bay cas dedica na haci mas investigacion y tocante Aruba su historianan y el a skirbi buki.
“Ora mi a skirbi mi prome buki mi a dicidi di entregue na diferente instancia, y un di nan, sigur, ta Archivo Nacional. Mi a bin contribui cu buki, potret, temanan di historia di Aruba y hasta mi artefactonan di guera, alomenos dos: e torpedo y e submarino cu a causa desaster dilanti Lago”, Dufi Kock a relata.
Despues el a pensa kico ta bay pasa cu tur su documentacion historico y e ora ey el a dicidi di entrega nan na Archivo Nacional Aruba (ANA), na unda e ta sigur nan ta bay ta den un bon lugar, y alavez accesible na tur esnan cu ta bishita Archivo. “Pesey mi ta pidi na tur esnan cu tin documentacion historico y artefactonan, pa no laga nan na cas pasobra mañan bo no a kico ta pasa cu nan. Bin entrega nan na Archivo, unda bo ta sigur cu safe y accesible pa tur hende. No tine na cas pasobra no tur ora bo ta haya bishita di hende. Pero aki na Archivo si”, señor Dufi Kock a remarca.
