ORANJESTAD (AAN): Na momento cu un persona bin den contacto cu e virus di Sarampi, e prome sintomanan normalmente ta cuminsa aparece entre 10 cu 14 dia despues di e contacto.
Sarampi (conoci como ‘Measles’ na ingles) ta afecta e via respiratorio y despues ta plama full den e curpa. E prome sintomanan ta dura entre 4 pa 7 dia y ta encera: (*) Nanishi ta core. (*) Keintura. (*) Tosamento. (*) Wowo cora y ta core awa. (*) Manchanan blanco chikito parti paden di e boca.
Entre 7 cu 18 dia despues di e contacto cu e virus ta aparece un rash cu mayoria di biaha ta cuminsa na cara y nek pa despues plama riba full e curpa. E rash ta dura den mayoria caso alrededor di 5 pa 6 dia prome cu e disparce.
Mayoria morto a consecuencia di Sarampi ta pa motibo di complicacion relaciona cu e malesa. Complicacionan cu por presenta ta: (*) Pulmonia. (*) Meningitis. (*) Cieguedad. (*) Ataca. (*) Infeccion di orea. (*) Diarea severo cu deshidratacion.
Tur persona cu no ta vacuna of esnan cu a worde vacuna y no a desaroya immunidad por worde contagia. Muchanan no vacuna y hende muher na estado ta esnan mas na riesgo pa desaroya complicacion. Si un hende muher na estado haya Sarampi durante su embaraso esaki por ta hopi peligroso pa e mama y por resulta den un parto prematuro pa e baby.
