ORANJESTAD (AAN): Relaciona cu e reglanan di cuarentena cu a wordo adapta siman pasa, Sharline Koolman di Departamento di Salud a splica den conferencia di prensa
cu pa e motibo mes cu omicron ta menos agresivo, a bin cu e regla pa keda den cuarentena 5 dia so.
El a bisa cu e personanan cu ta vacuna, por bira malo tambe pero mesun malo cu esnan no vacuna nan no ta bira.
Pa e motibo ey, a dicidi cu toch mirando cu e mundo di negoshi cu mester sigui draai y na cierto momento por haya un paro total riba e isla, a bisa. Esey no por ta door di hendenan cu ta den cuarentena. "E por ta si door di hendenan cu ta den isolacion y e hende ta hopi malo. Pero esey no ta locual a sosode.
A base di discusionnan cu tabata tin siman pasa a dicidi di toch haci cambio den esaki y baha e dianan di isolacion di 10 te na 5 dia.
Koolman a splica cu por ehempel, si un persona ta presenta sintoma awe, awe e no a bay test ainda, pero maňan ta yama docter di cas, a haya un codigo pa bay test y ya caba a pasa un, dos of tres dia cu e sintomanan a presenta.
E dia indica ta test, pero claro cu di dia cu e persona ta malo, cu a haya e prome sintoma, mester isola bo mes. Ya sea cu bo a haya un griep of otro infeccionnan respiratorio.
E persona ta bay haci su test y pa esaki ta pidi encarecidamente pa bay haci e test riba e dia cu tin afspraak. No presenta un dia despues of prome ya cu esey ta crea un problema hopi grandi pa Hospital, Koolman a duna di conoce.
Bay na e ora cu e stipula. Si bo tin un afspraak 10 am no presenta 12 or of otro ora cu no ta esun cu bo mes a solicita riba e app. Cu esaki ta bruha e schedule, a remarca.
Esaki ta e problema cu e confronta cu ne na Hospital cu e rijnan largo y esaki tin di haber cu e hendenan cu a acudi pa haci test na un otro ora cu no ta esun stipula.
Ora di haci test ta pa confirma kico un persona tin. Pero si un persona tin tur sintoma, mester keda cas. Si a haci test esey no ta bay cura bo, Sharline Koolman a enfatisa Simpelmente mester pasa den e proceso, a agrega.
Asina cu un persona ta test, e dia ey mes ta haya e resultado atardi of anochi y si ta sali positivo ta cuminsa conta desde e dia ey mes cinco dia. E informacion completo riba esaki ta bin den e email cu e persona ta haya cu e resultado. Esey ta wordo manda cu un fecha di e dia cu mester drenta isolacion y e dia cu mester sali for di dje.
Si e dia cu bo ta suppose di sali for di isolacion ainda bo ta sinti malo, locual por, e ora mester tuma contacto cu Departamento di Salud Publico (280-0101 of 280-0505) of manda un email pa This email address is being protected from spambots. You need JavaScript enabled to view it..
E di cinco dia ey si bo ta bon, y no tin ningun sintoma mas (akinan ya caba a pasa 7 pa 8 dia malo), esey kiermen cu bo por sali for di isolacion y por bay traha bek of sigui haci bo actividadnan normal.
Si e dia ey bo ta malo ainda of bo no ta sigur bo ta haya DVG pa bisa cu ainda bo ta malo y bo ta bolbe bay bek riba e lista y bo por keda cas den isolacion un of dos dia mas. Esey ta e afspraak cu tin cu Medwork y cu SVb, e Crisis Team Leider, Sharline Koolman a declara den detaye.
