ORANJESTAD (AAN): Diadomingo awor, dia 2 di april, ta Diadomingo di Rama y pueblo di Dios lo rebiba Hesus su entrada triunfal na Herusalem cu bendicion di rama, procesion y Santa Eucaristía.
Ta topa 7:30 am na Plaza Curason Inmaculada di Maria pariba di misa, unda lo bendiciona e ramanan pa despues sali den procesion. Pastor Jairo Maduro y Pader Jose M. Nava ta haci un apelacion na tur fiel pa sigui cu debocion e proceso di combersion na Dios. Laga Hesus drenta e tempel cu ta bo bida, bo Herusalem pa cuminsa un bida nobo.
Ta invita un y tur pa tuma parti na e siguiente actividadnan den Semana Santa:
Dialuna, 3 di april - 6:15 pm Caminda di Cruz den misa; 7:00 pm Celebracion Eucaristico y 8:00 pm Oportunidad pa confesa
Diamars, 4 di april - 6:00 pm Trecena di San Antonio; 7:00 pm Celebracion Eucaristico y 8:00 pm Oportunidad pa confesa
Diaranzon, 5 di april – 7:00 pm Misa Crismal na Pro-Catedral San Fransisco di Asis, celebra pa Mgr. Luis A. Secco y con-celebra pa tur Pastor di Aruba. No tin misa na otro parokia. Mgr. Secco lo consagra azetanan pa bautismo, confirmacion, sacramento di enfermo y sacramento di orden sacerdotal pa uso den e aña liturgico aki. Durante Santo Eucaristia e Sacerdotenan di nos Isla lo renoba nan promesa sacerdotal.
Diahuebs, 6 di april – Diahuebs Santo Conmemoracion di Ultima Cena di Señor.
7:00 pm Celebracion Eucaristico. Lo celebra e misterionan di Institucion di Santa Eucaristia, Orden Sacerdotal y Cristo su mandamento di stima otro. Despues di predicashi tin labamento di pia. Mesora despues di Misa ta sigui cu Adoracion te 10:00 pm. Keda compaña Hesus den su agonia.
Diabierna, 7 di april – Diabierna Santo di Pasion y Morto di Señor.
5:00 am Caminda di Cruz di bario di Santa Cruz. Ta sali for di parking lot pariba di misa y lo pasa den Santa Cruz y Papilon y caba na entrada principal di misa. Ta gradici e 14 famianan cu a pone nan cas disponibel pa resa un stashi. Ta haci un yamada na tur fielnan pa tuma parti na e Caminda di Cruz den bario pa medita riba Hesus su ultimo dia riba mundo.
8:00 am Caminda di Cruz di Mama Maria den Ser’i Noka. Bin cana hunto cu Mama di Hesus, y mira pa medio di su wowonan, loke Hesus a pasa aden riba Su caminda pa Calvario.
10:00 am Caminda di Cruz den misa pa muchanan. Laga e muchanan conoce Hesus y e nificacion di Su caminda di Cruz.
2:15 pm Lectura y Meditacion di 7 Palabranan di Hesus pa Pader Jose M. Nava. Na cruz claba, Hesus a papia shete bez. Ban hunto medita riba e palabranan aki.
3:00 pm Conmemoracion di Pasion y Morto di Señor. Lectura di Pasion di Señor y Adoracion di Cruz.
5:00 pm Nobena na honor di Hesus Misericordia
Diasabra, 8 di april – Diasabra di Aleluya
8:00 pm Celebracion di Vigilia Pascual, Resureccion di Señor. Bendicion di candela nobo, Bautismo, Eucaristia, bendicion di awa. Tur hende trece un bela y boter pa awa bendita.
Diadomingo, 9 di april – Diadomingo di Pasco di Resureccion
8:00 am – Misa Solem di dia di Pasco di Resureccion
11:00 am - Misa Solem di dia di Pasco di Resureccion na Spaño
6:30 pm - Misa di atardi di Pasco di Resureccion
Dialuna, 10 di april – Di dos dia di Pasco di Resureccion
9:00 am - Celebracion Eucaristico y 11:00 am – Bautismo.
