Diego de Cuba ta sigur cu Manager di Seguridad di Triple A ta tras di su retiro:
ORANJESTAD (AAN) – Diego de Cuba, Presidente di Sindicato STA, a sigui relata kico tin tras di su retiro for di Triple A, NV. El a indica cu dia 27 di December di aña 2021, Directiva di e sindicato a entrega un keho na e “Internal Audit”, pa nombramentonan descabeya cu a tuma luga sin cumpli cu e Contrato Colectivo, y a exigi di Internal Audit e tempo ey, un carta cu a wordo firma pa mas di 50 empleado trahando den e Departamento di Seguridad, mirando e hecho cu esaki tabata concerni e Departamento aki.
“E nombramentonan cu a tuma luga tabata descabeya, berdaderamente, y e hendenan cu mester a bay ocupa e puestonan e tempo ey a wordo, gewoon, laga un banda; y nos a ripara cu tabata tin ‘nepotismo politico’ andando, violando tur e reglanan cu tin den CAO. E tempo ey Carlos Rojer (dfm) tabata dirigi e departamento di Internal Audit, y el a atende cu e asunto aki. Mi ta kere cu desde e tempo ey mi a trapa riba su tenchi, pasobra loke el a haci tabata completamente for di sla”, de Cuba a subraya.
El a sigui splica cu ora cu e rapport aki a keda cla, lamentablemente, Carlos Rojer (dfm) a sufri un accidente y a fayece. “Nos a keda biba cu e situacion, tur cos a keda cana, y nos a keda atende cu tur problema. Nos a pasa den e situacion di covid y danki Dios nos a bin bek”, de Cuba a relata.
De Cuba claramente ta sinti cu su retiro for di Triple A tin e man di e Manager di Seguridad, Lacle, su tras. El a bisa cu dia 4 di Mei ultimo, a sosode un incidente na screening point di Aeropuerto, cu ta algo hopi delicado, sensible y bochornoso, y cu por a hinca Aruba den un problema masha grandi mes, y mata nos turismo. Pero cu e no por bay den detaye riba dje ni divulgue. El a bisa cu e empleadonan riba vloer cu a experiencia esaki a sinti nan mes hopi humilia y vulnerable, cu a bin keha cune y pidi’e pa entrega un keho y pidi un investigacion door di Internal Audit. “Logicamente como lider sindical mi no por a nenga nan esey” el a expresa. El a señala cu e dos personanan cu a “echa e baina” ey ta dos brothernan di e manager di seguridad ken a coi tur e problema serio cu a sosode, cu ta castigable hasta cu prison, scond’e bao su braza. Ora STA a entrega e keho na Internal Audit, e bala a cuminza lora y e ora ey e unico opcion cu e manager di seguridad tabata tin ta elimina Diego. E keho pa investigacion cu STA a presenta copia a bay tambe pa Aviacion Civil, DCA.
De Cuba a señala cu e manager di seguridad mester a pone e dos personanan concerni na schorsing y pidi investigacion pero e no a hacie. El a remarca cu aworaki tur hende por compronde con profundo e persecusion contra su persona, ta.
