Congreso Mericano ta atende cu e menasa di tranformacion digital
*Mester adapta leynan vigente na avance Inteligencia Artificial?
*Robot no ta produci placa pa e sostene economia cu su compra
ORANJESTAD (AAN) — Mientras 2023 ta duna continuamente prueba di ta e caminda pa un futuro mundial completamente nobo, DIARIO continuamente a mustra riba uno di e aspectonan mas importante cu tanto e situacion mundial actual como e transicion pa futuro ta exigi.
Pa paisnan funciona mester di leynan cu ta dicidi directamente riba asuntonan relata directamente na e funcion.
Den e dianan aki, informacion di Senado Americano ta confirma e intentonan serio den Congreso Mericano pa haci e realidad di Inteligencia Artificial visibel den e cuadro di leynan di e pais.
Con Inteligencia Artificial ta mishi directamente cu e interes di un comunidad y tur miembro di un comunidad?
Con a base di legislacion ta atende cu cambionan grandi cu ta afecta no solamente companianan pero hasta bida priva?
Inteligencia Artificial ta mishi practicamente cu tur ley cu ta regla pa cuminsa e seguridad y bienestar di e ser humano, pero tambe di estado, di compania y tur loke ta base di un comunidad.
E problema grandi ta, cu comunidad mundial a acepta e entrada y avance di Inteligencia Artificial sin tene na consideracion, e aspectonan secundario cu e ta trece cune y ta mishi directamente cu cantidad di leynan cu ta defende hasta bida di un ciudadano!
Pa analisa un situacion comprendibel pa tur hende, despues di investigacion di materia cu normalmente no ta alcansa e publico general, mester haci investigacion y presenta relatonan cu tur hende por comprende.
Kico ta pasa cu e seguridad humano y nacional riba tur nivel?
Dos persona ta combersa cu otro y henter e combersacion por ta wordo filma sin autorisacion di e otro persona.
Un telefon ta duna oportunidad na spionahe y asina por destrui seguridad personal di un persona cu no ta realisa cu un invasion ta wordo haci riba su bida.
Cu leynan cu ta mishi directamente cu Inteligencia Artificial ta necesario na mundo, a bini dilanti sigur den Senada Mericano, caminda tur Miembro tabata di acuerdo cu Gobierno tin un papel importante den introduccion di regla pa Inteligencia Artificial, cu manera ya a wordo bisa ta mishi cu derechonan humano fundamental pero tambe e funcionamento di un base comercial democratico liber y e derechonan di un trahador y di empresanan comercial sin menciona e papel cu e ta desplega den e aparato gubernamental.
Inteligencia Artificial, e culminacion di e Era Digital, ta mishi cu legislacion democratico cu ta regla e derecho pa haci negoshi como fuente di entrada empresarial y e derecho y proteccion di e entrada di e trahador.
Sigur den un mundo caminda cambio di clima y salida di petroleo por ehempel ta pusha contra un muraya, e empresa como fuente principal di trabou segun democracia, mester por sigura su mes e entrada necesario pa keda cabez riba awa.
Na mes momento e trahador local conoce defensa legal den mantencion di su trabou, cu por ehempel no por wordo afecta pa trahador ilegal cu ta bira menasa pa su pan di cada dia.
Si e trahador perde trabou, e no por produci placa pa mantene comercio bibo. Di e forma ki un Gobierno no tin placa ni di comercio ni di trahador, pa e por funciona.
Contrario na un trahador ilegal, e sistema digital hancra den Inteligencia Artificial, no ta produci placa na tur empresa cu e trahador ta alimenta den e circulacion di placa den un comunidad democratico.
Si no tin comercio of comercio bira victima di legislacion cu no ta tene na consideracion cu e comerciante tambe tin derecho riba proteccion di su entrada, con economia liber ta funciona?
2023 ta yega su ultimo trimester pa drenta historia como e aña di mayor transicion cu mundo a ignora den planificacion, pero cu sigur e pandemia Covid-19 a cambia.
Despues di Covid-19 mundo ta reconstrui su mes cu asistencia di tecnologia, cu mente digital capaz pa procesa informacion dia y anochi, sin tene na consideracion cu e mester drumi, descansa, manera ta e caso cu hende.
E lugar di Inteligencia Artificial tanto den campo empresarial como den sector laboral mester wordo discuti ya cu actualmente e ta bira mas y mas importante na un mundo, cu a ignora elementonan importante den convivencia manera e problemanan di clima tambe ta demostra.
Con ta inclui Inteligencia Artificial den nos leynan, sigur ta importante manera Merca a duna prueba den su Senada, cu tabata di opinion cu Gobierno tin un responsabilidad grandi den e funcionamento nobo di comunidad a base di e cambionan radical introduci pa Inteligencia Artificial.
