Ryan Maduro, Director General di Colegio EPI
ORANJESTAD (AAN): Claudia Whitfield, Directora di Enseñansa na Colegio EPI y Director General Ryan Maduro tabata diaranson mainta den un entrevista cu Aldrich Croes den su programa "Entrevista di Dia' na Hits100 FM unda nan a elabora riba e situacion general na EPI ya cu e dianan aki tabata tin hopi speculacion relaciona cu algun cancelacion di opleidingnan.
E situacion aki a crea hopi incertidumbre cerca e studiantenan pero tambe cerca e mayornan. A tende diamars e version di Minister di Enseñansa Endy Croes unda el a laga sa cu por ehempel, e opleiding di IT lo sigui normal. Pero kico ta e situacion di e otro opleidingnan? Esaki ta loke e representantenan di Colegio EPI a aclarea den e entrevista aki.
Ryan Maduro a splica cu gran parti di e noticianan cu a sali den algun medio y den rednan social no ta cuadra cu berdad.
Esun cu ta bisa cu EPI ta bay elimina e opleidingnan pa semper no ta berdad, cu EPI ta bay stop e opleiding di IT y di 'Culinary Arts' no ta berdad. Tambe a ser bisa cu empleadonan di EPI ta bay perde nan trabao, cu EPI ta cera pa semper y cu ciento di studiantenan no lo haya cupo, etc.
Maduro a laga sa cu ta importante pa duna algun dato importante pa haya sa con a yega te eynan. El a indica cu na 1994, ora cu a cuminsa cu e idea di trece scolnan di 'beroepstechnische onderwijs' hunto bao di un capa cu yama EPI, e tempo ey, difunto minister Mary Wever a laga haci un estudio riba e eficacia di 'beroepstechnische onderwijs' na Aruba.
E raport a indica cu e no tabata traha bon. A dicidi e ora pa crea EPI cu cuatro scol hunto manera MTS Cesare Terzano y MAO scol cu a bay bao di e capa di EPI.
Na 2004 EPI a cuminsa como scol y e tempo ey tambe tabata tin consternacion pasobra tabata tin opleidingnan cu a para y tabata tin cosnan cu a pasa, pero tabata tin un cambio necesario pasobra e raport tabata mustra cu no por a sigui den e direccion cu tabata bay, Ryan Maduro a señala.
EPI a haci diferente intento pa haci innovacion. E ultimo biaha cu a renoba e curiculo na EPI tabata na 2009/2010. EPI tin un curiculo cu tin mas di 11 aña bieu y no a wordo renoba. 'Beroepstechnische onderwijs' ta un tipo di enseñansa hopi dinamico. E naturalesa di 'beroep' mes ta cambia, a remarca.
'Beroepstechnische onderwijs' tin cu innova y aworaki e studiantenan ta hayando problema cu conexion den e veld, pero tambe problema cu continuidad den enseñansa pa motibo cu e curiculo ta bieu, a expresa
E exito di e studiantenan cu ta duna continuidad na e estudio, cuanto di nan ta faya pasobra nan no por conecta manera cu debe ser, a agrega. Asina tin diferente cos cu ta bin dilanto y 'feedback' di e veld.
E veld ta bisa cu mester cambia e opleidingnan pasobra nan no tin conexion mas y e ora a bisa pa bay haci e di tres intento. Aworaki a logra localisa fondo pa medio di e NSP Project (National Strategic Plan SDG's) di Directie Economische Zaken cu a identifica fondonan.
E proceso a cuminsa na Januari 2021 di bay traha riba innovacion di enseñansa hunto cu Scol EPB.
Sra. Whitfield a agrega cu e 'lack' di fondonan ta pone cu tin biaha tin cu bay haci scogencianan y pa EPI door di e raport mester bay renova e curiculo. Aworaki pa por haci esaki mester ta creativo pasobra no tin fondonan.
A dicidi e ora ey cu pa un aña cierto opleidingnan cera pa e docente di dicho opleidingnan por bay haci renovacion y recapitulacion di e manera cu nan ta duna nan les. Esnan cu ta den opleiding caba cu por a keda sinta, e 'basis jaar' ta sigui pa nan.
