Entrega di segundo cambio di presupuesto na Parlamento

Entrega di segundo cambio di presupuesto na Parlamento

Ministro Geoffrey Wever

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever ta informa cu Gabinete AVP-Futuro a entrega su di dos cambio di Presupuesto 2026 na Parlamento. E segundo cambio di Presupuesto 2026 ta cumpli, mescos cu e presupuesto 2026, y e prome presupuesto supletorio, cu e norma di minimo un porciento manera ancra den ley.

   Cu esaki Gabinete AVP-Futuro ta continua su maneho financiero di keda cumpli cu normanan di presupuesto manera ancra den ley di supervision.

   Despues cu Gabinete AVP-Futuro a entrega e Najaarsnota 2026 riba prome di september 2026 pa asina Parlamento tin un bista di gobierno su proposicion pa e segundo cambio di e Presupuesto 2026 awor ta entrega oficialmente e concepto di ley pa e segundo cambio di presupuesto 2026.

  E segundo cambio di presupuesto 2026 ta premira un saldo financiero di Afl. 112 miyon cu ta igual na 1,4 porciento di e producto interno bruto. E segundo cambio di presupuesto ta refleho di continuacion di Gabinete AVP-FUTURO pa duna e  beneficio di economia bek na comunidad. Presupuesto 2026 ta refleha cu tur luna 22 mil beneficiario di di AOV y AWW ta ricibi Afl. 400 Florin extra na reparatietoeslag.

   Gabinete a introduci un structura salarial nobo pa personal di enseñansa y a mehora e posicion huridico di personal di cuadro administrativo. Gabinete a aumenta e subsidio di asistencia social di 450 pa 600 Florin. Accijns riba gasoline y diesel ta encera un bahada extra te cu fin di aña. E tarifa di impuesto riba entrada a baha di 10% pa 0%. E medida aki a cuminsa anteriormente y, hunto cu e otro medidanan, ta fortifica e maneho di gabinete pa mehora poder di cumpra. Gabinete a aumenta e subsidio pa cumpra material escolar te na 250 Florin pa mucha, cu un maximo di 1.000 Florin pa famia. Gabinete a aumenta e contribucion pa mayornan pa cubri gastonan di schoolgeld di 120 pa 250 Florin pa mucha. Gabinete a aumenta e suplemento mensual escolar di 250 pa 300 Florin pa luna.

   Cumpli cu e normanan presupuestario ta keda esencial. Alavez, nos ta sigui uza e recursonan di Pais Aruba pa mehora poder di cumpra y calidad di bida di nos comunidad”, minister Wever a expresa.

   Adicionalmente den e segundo cambio di Presupuesto 2026 Gabinete AVP-Futuro ta pidi Parlamento su autorisacion pa finalisa e acuerdo cu Stichting Onroerend Goed Aruba pa construccion di e MFA na San Nicolas y ta transferi e derecho di erfpacht na Pais Aruba. Ademas ta pidi Parlamento su autorisacion pa un suma di Afl. 2.3 miyon pa renova su casnan y e terenonan di uzo comun den De Vuyst y Bushiri. E meta di e maneho ta pa mehora e facilidadnan social y e calidad di e ambiente di biba na San Nicolas, De Vuyst y Bushiri.

   Cu entrega di e segundo cambio di presupuesto 2026 cu ta cumpli cu ley, Gabinete AVP-Futuro ta pidi Parlamento su aprobacion pa continua cu implementacion di e Programa di Gobernacion AVP-Futuro 2025- 2028. E segundo cambio di presupuesto 2026 ta inclui e consehonan di CAft y Raad van Advies, hunto cu e reaccionnan formal di Gobierno. Cu e entrega oficial gobierno ta cumpli cu un parti legislativo di e proceso presupuestario segun minister Geoffrey Wever.

   Minister di Finansa Geoffrey Wever ta gradici Conseho di Ministro, Departamento di Finansa, Departamento di Legislacion y Asunto Huridico y tur demas departamento y instancianan cu a duna nan contribucion valioso na e proceso di e segundo cambio di presupuesto 2026.