Ombudsman birando realidad
ORANJESTAD (AAN): Recientemente Ombudsman señora Jurima Bryson a otorga e Behoorlijkheidswijzer na minister-president Mike Eman. E Behoorlijkheidswijzer ta un manual cu tin e normanan di conducta apropia di Ombudsman di Aruba.
E normanan di conducta apropia a worde publica e luna aki riba paginanan di social media di Ombudsman pa pueblo tambe tin acceso na e normanan cu ta forma e base pa e trabao di nos Ombudsman. Ora un keho worde entrega na Ombudsman of Ombudsman haci investigacion riba su propio iniciativa, Ombudsman lo evalua si un of mas di e normanan a worde viola.
Despues di e publicacion online di nos normanan di conducta apropia pa nos comunidad, minister-president a haya e prome copia di e Behoorlijkheidswijzer, cu señora Bryson a entrega personalmente na su persona.
Despues di e entrega oficial, señora Bryson a haya e oportunidad pa elabora riba e 22 normanan. Tambe señora Bryson a duna minister-president un relato di e tareanan cu a worde conclui e ultimo lunanan y esunnan cu ta plania pa e periodo nos dilanti cu e meta pa yega na e momento unda lo bay habri porta di Bureau Ombudsman.
Durante e encuentro tur dos partido a comparti pensamento pa cu con comunidad di Aruba lo por beneficia optimalmente di un Ombudsman, un instituto independiente cu lo bay supervisa cu e normanan di conducta apropia ta worde aplica serca e institutonan cu ta cai bou di mandato di Landsverordening Ombudsman (LvO).
Oficina di Ombudsman Aruba kier informa cu nan lo mantene pueblo na altura di e ultimo desaroyonan y encuanto e apertura oficial di bureau.
Pa por keda na altura di e ultimo desaroyonan, por bishita tambe e paginanan di Facebook ‘Ombudsman Aruba’, Instagram ‘ombudsmanaruba’ y LinkedIn ‘Ombudsman Aruba’. Por ehempel, al momento riba nos paginanan di social media tur 7 vacatura di Bureau Ombudsman ta disponibel.
