Feria di buki flotante mas grandi
ORANJESTAD (AAN): E mundialmente famoso barco ‘MV Logos Hope’, cu ta e feria flotante di buki mas grandi na mundo, a drenta y mara na Waf di Playa aki na Aruba.
Logos Hope ta un organizacion sin fin di lucro, opera pa GBA Ships (Good Books for All) cu ta djis viaha rond mundo pa comparti conocemento, yudansa, y speranza via di diferente interaccion cultural y educacional, sea abordo of den comunidadnan local.
Abordo di e barco aki, tin un Feria di Buki cu ta habri pa publico en general por bay bishita. Nan tin mas di 800.000 buki di riba di 5.000 titulo di buki. Nan ta varia den tipo di literatura. Ademas di esey, nan ta participa den diferente proyecto den comunidad, y ta uni cu otro organizacionnan sin fin di lucro, y iglesianan, pa asina trece cambio positivo. Den pasado hasta hobennan di Aruba a yega di nabega hunto cu nan den viahenan pa tantisimo waf rond mundo.
Logos Hope lo bay ta habri pa publico den Waf di Aruba, for di awe Diasabra 15 di Maart 2025 te cu 6 di April 2025. Pa mas di 3 siman nan lo ta sperando bishita di pueblo di Aruba na e Book Fair.
Horario di bishita: Pa publico bishita e barco, e horario lo ta como lo siguiente, y tuma bon nota.
Di Diaranson pa Diasabra for di 10:00 am te cu 10:00 pm.
Riba Diadomingo e horario ta for di 1:00 pm te cu 10:00 pm.
Riba Dialuna e ta cera y no ta ricibi bishita.
Riba Diamars e ta habri di 11:00 am te cu 10:00 pm.
Nan lo cobra 2 Florin di entrada pa persona. Pero tuma nota cu personanan bao di 12 aña ta drenta gratis. Personanan riba 65 aña tambe ta drenta gratis.
Muchanan bao 18 aña mester ta acompaña pa un adulto. Un adulto por supervisa 10 mucha. Nan no ta acepta Debit Cards.
