Celebrando nos identidad...
ORANJESTAD (AAN): Fundacion Salvaguardia e Herencia Cultural di Aruba (FSHCA) ta anuncia en conexion cu su prome aniversario, su prome Siman di Cultura cu lo tuma luga den e luna di September venidero. E lo cuminsa dia 19 di september y lo termina dia 26 di September venidero cu un tremendo manifestacion cultural na Scol di Arte na San Nicolas.
E Siman di Cultura, ta un actividad cu ta celebra nos patrimonio nacional, pero tambe prepara personanan pa nan por bay den barionan y continua promocionando nos Arte y Cultura. Un siman unda no solamente lo celebra nos identidad, pero unda un y tur por siña mas di nos Arte, Cultura y Folklore. Den e siman aki lo tin tayernan di baile, teatro, musica, arte culinario, charlanan y hopi mas.
Cada interesado por bay e tayernan y na final di e siman, lo presenta loke nan a produci. Pues tur dia lo tin un tayer of charla y tur persona por inscribi na esaki gratis. E ta pa tur edad.
Tambe lo prepara e instructornan den e area di Folklore, unda nan lo bay den e barionan y sigui propaga nos Cultura. Asina lo activa e barionan, nan lo trece Arte y Cultura mas cerca di e hendenan cu ta biba den e bario. E ora ey nos por proteha y traspasa nos Arte y Cultura na nos siguiente generacionnan.
A invita expertonan di Curaçao y Bonaire pa bin duna nan experticio den cuadro di Arte y Cultura. Hunto cu e expertonan local, lo trece diferente charlanan cu topiconan di nos Folklore.
Tambe e scol di baile ‘Harmonia y Goso’, bou direccion di Erno y Nilva Cordelia lo bin Aruba pa trece e baile di Quadrilla bek. Manera ta conoci cu pa hopi aña e baile a bay perdi, pero danki na e colaboracion cu nos hermana isla, nos lo trece e baile aki bek den nos Folklore.
Cu e actividad aki nos kier na prome luga celebra nos Arte y Cultura. Na di dos nos ta desea pa tur persona sinti nan mes un biaha mas orguyoso di a nace y ta biba riba un isla encanta manera Aruba. Na di tres luga pa trece tayernan, charla y asina tur persona por siña algo di nos Arte, Cultura y Folklore Arubano.
Y tambe tin e meta di “train the trainers” y asina nos por prepara e “trainer” aki mes pa nan bay den nan bario, propaga y conserva nos Arte y Cultura.
Nos ta duna un danki special na nos patrocinado UNOCA cu semper ta sostene nos cultura, un danki na tur persona cu ta haci e actividad aki posibel y nos ta haci un yamada na tur instancia, compania y persona cu ta desea di haci un donacion por haci esaki riba nos cuenta di Aruba Bank # 7689910190. Pueblo di Aruba ta cordialmente invita!
