Ministro Dangui Oduber
- Conseho huridico a duna OK pa esaki sosode
- Esaki ta un beneficio vital pa tur nos grandinan
ORANJESTAD (AAN): Den un paso importante pa sostene nos hende grandinan, Minister Dangui Oduber ta anuncia cu entrante 1 Februari 2025, tur remedi pa pensionadonan lo ta cubri completo bou di AZV.
Dia 25 di Juni 2024 un mocion a worde pasa, despues cu 20 parlamentario a vota na fabor, pa asina cubri e gastonan di tur remedi pa nos grandinan bek. Conseho a worde pidi na AZV pa si esaki ta posibel y sostenibel. E conseho aki a dura algun luna prome cu minister Oduber a ricibi esaki. Despues cu a ricibi e conseho gobierno a cai y bira demisionario y esey a pone cu mester a busca un conseho huridico si un decision asina ta worde considera un “lopende zaak”.
Minister Oduber a pidi e conseho riba e status demisionario di e gobierno actual y e conseho a drenta net promer cu eleccion.
Minister Dangui Oduber ta enfatisa cu e decision aki a tuma luga awo, despues cu a ricibi e situacion financiero di e resultado financiero di 2024 y e proyeccion pa 2025. E cifranan tabata di suma importancia, paso e decision aki ta un compromiso structural. Ora cu cuminsa cu e cobertura, e pago mensual pa remedi di nos pensionadonan ta bira un gasto continuo.
Si nos tur ta corda, na 2022 Hulanda a impone un cortamento drastico di 60 miyon Florin den e presupuesto di AZV. Esaki a haci cu mester a corta den dunamento di remedi cu no ta worde cubri ningun parti di mundo. Apesar di reto aki, awe e decision di kita pago di remedi pa nos pensionadonan ta bira realidad, cual ta un beneficio vital pa nos grandinan.
Cuminsando dia 1 Februari 2025, pensionadonan lo tin un preocupacion menos, cual ta reafirma e dedicacion di nos gobierno.
Dangui Oduber aki a declara: “Nos a bisa den campaña cu MEP lo duna nos grandinan e remidanan bek y awe ta cumpli cu esaki.”
