Vocero Robby Rosel a confirma:
- Special esnan cu ta opera den garashi di cas
- Mester tin vergunning y pago di number cla pa no haya boet
ORANJESTAD (AAN): Siman a habri cu un anuncio cu sigur lo por crea hopi combersacion y discusion riba e asunto aki. Specialmente esnan cu ta bibando den zona residencial, y tin un “garashi” pa drecha auto of motorcycle den nan bario. Debi na esaki ta haya holor di azeta, holor di fliet di verf, y henter dia, y hasta anochi cu marduga ta revv motor fuertemente strobando muchanan chikito di drumi.
A bin sali na cla, cu Bureau City Inspector ta pone atencion riba tur garashi cu tin rond di Aruba, hasta esnan “bao palo”. Ya caba City Inspector ta bishitando garashinan cu tin rond di Aruba, unda tambe tin varios cu ta ilegal, segun informacion cu e vocero Robby Rosel a duna, den entrevista cu DIARIO.
Den e rosea aki, Rosel a trece dilanti pa cada un di e mecaniconan cu ta uza nan garashi na nan cas, nan zorg pa ora nan tin autonan bieu para pafo di cura di nan cas, of den e tereno, of den cura di nan cas mes, pa presenta nan vergunning ora cu City Inspector yega; percura pa tin bo seguro di auto, y e number plat di e auto paga. Y si e auto ta di otro doño esaki mester tin tur esaki na ordo, pa e auto por ta na bo cas. “Si bo tin bo papel cu bo vergunning kiermen cu bo tin derecho di tin un garashi pa bo por drecha auto. Bo no tin esakinan regla tene cuenta cu di biaha nos ta duna bo un multa pa esaki. Pasobra nos a papia hopi, nos a trece hopi mensahe p’adilanti, pero e no ta yega na oido di ningun”, segun Robby Rosel, vocero di City Inspector a bisa.
“Pero awo a yega e momento cu entrante Diahuebs 1 di Augustus p’adilanti, ya caba nos lo bay reparti boet pa esnan cu no tin papelnan. Asina ta, tene bon cuenta riba esaki, cu entrante 1 di Augustus bo mester tin bo papel cu bo ta un mecanico inscribi na Camara di Comercio, bo mester tin papel di seguro di e auto cu ta para pafo riba caminda publico, su papel di number plats, pa bo no haya un boet y pa e autonan ey por keda”, Vocero di BCI Robby Rosel a reitera.
Algun persona lo hasta tin e anhelo, cu Cuerpo Policial y tambe City Inspector por check e ‘molester di sonido’ cu ta sali for di algun garashi cu ta pensa cu revv motor fuerte di dia, anochi, y marduga ta algo pret pa haci. Ta henter comunidad di un zona residencial ta keda disgusta.
