Gobierno Evelyn Wever-Croes a forma un fortalesa contra loke ta bini
- 2023 ta duna bista cla di loke futuro directo tin prepara pa mundo
- Hende por pone mundo den reverse ora e pone fin na epoca di Jet?
ORANJESTAD (AAN)- Prepara pa cambionan grandi. Esaki tabata e base informativo di DIARIO for di momento cu Aruba a subi caminda di recuperacion despues di e Pandemia Covid-19, pa hunto cu mundo worde confronta cu e turbulencia cu petroleo a crea.
Tabata e Guera di Petroleo, e motibo grandi tras e maneho di expansion Ruso, cu a bira tera fertil pa un inflacion cu a ataca publico cu prijsnan halto.
Mundo por a silencia Guera na Ukraine, cu ta sigui manera nada a pasa pero na forma mas silencioso cu no ta haya tanto atencion.
Mundo kier haci kere cu e por enfrenta e crisis di combustibel.
Sinembargo, dirigentenan mundial no ta bisa, cu pa nan enfrenta combustibel nan mester kita for di hende tur loke a bira placer den e mundo cu invento di Jet a cambia y a haci chikito.
For di inicio di 2023, manera lectornan por a tume nota, DIARIO a percura pa Aruba ricibi tur informacion cu awor na climax di un situacion mundial sumamente importante, ta cuminsa presenta publico e realidad di loke ta bini.
Diasabra, manera DIARIO a anuncia, un pakete pisa di medida a drenta na vigor na Hulanda.
Un pakete den cual Hulanda a adapta su convivencia, su leynan, e base di bida di Hulandesnan pa confronta loke ta bini y cu hende no por controla.
Na Juni na Aruba, temporada di horcan a papia di cambio, y a habri cu un tormenta cu afortunadamente a muri den vecindario di Aruba, pero si a entrega prueba cu Aruba no por pretende mas cu horcannan no por bira peliger pa Aruba.
Cambio, cambio, cambio ta sigui otro manera DIARIO a adverti y pa por enfrenta e cambio aki Aruba y mundo mester di accion gubernamental pero tambe sikiera bon boluntad di tur gremio y tur participante na e comunidad cu mester sobrebibi.
Manera ya bisa, e cambionan cu ta spera mundo, pa un gran parti no ta laga decision den man di hende pasobra nan ta directamente mara na naturalesa.
Hende mester actua. Hende mester prepara su mes pa atende cu e retonan grandi manera cambio den e probabilidad di desaster natural; cambio den e forma cu ta atende cu placa cu ta e base pa mundo sobrebibi a base di intercambio comercial.
Siman a Gobierno Evelyn Wever-Croes a entrega Aruba e noticia mas importante na e momentonan aki. E entradanan di Aruba ta surpasa su gastonan. Esaki ta nifica cu Gobierno Evelyn Wever-Croes a logra atende cu e peliger grandi di biento Zuidwest riba tereno financiero di Aruba.
E siman nos dilanti Reino Hulandes, den persona di Secretario di Estado Hulandes pa Relacionnan den Reino, pues di Reino mes tambe, lo atende asuntonan financiero cu Gobierno di Aruba, cu debidamente a duna prueba di madurez di Aruba pa atende cu su situacionnan financiero.
Secretario di Estado Alaxandra van Huffelen tin su propio carga pa Hulanda riba su lomba cu e cantidad di medida cu Hulanda tambe mester a tuma y a drenta na vigor durante fin di siman.
Central den tur negociacion den Reino y na mundo, ta e cambio di bida pa hende enfrente naturalesa. E cambio di hende pa por enfrenta naturalesa.
E pregunta cu mundo mester contesta den tur honradez ta, con hende ta sobrebibi e cambio pa bolbe na e punto caminda hende y mundo tabata prome cu jet a haci su entrada.
Pasobra ta e epoca di jet a haci hende kere cu e ta dicidi pa naturalesa. Fin di e epoca di jet, di avionnan poderoso, ta uno di e temanan central den e futuro directo.
Esaki ta nifica cu ora tuma medida, mester mira con ta reemplasa e entrada y e placa cu e epoca di Jet a produci cu turismo, cu economia mundial, cu un mundo cu a bira chikito.
Nos por cruza Atlantico riba Raft, riba tronconan di mata mara na otro? Kico ta pasa cu turismo ora tur pasashi subi den henter e sector di comunicacion?
Un siman nobo ta habri. Un siman cu Aruba por confronta cu mas confiansa despues cu Gobierno Wever-Croes a deshaci di aventura y a mustra responsabilidad pa e pais, cu no por perde tempo pero mester prepara pa e mundo nobo cu ya ta bira realidad, manera Alexandra van Huffelen y Gobierno Hulandes ta realisa y a demostra for di momento cu entrada pa Juli, a bira cambio na Hulanda hasta pa e baki den cual ta come frietjes.
