Ultimo edicion di DIARIO prome cu siman di dianan di fiesta
*Inauguracion presidencial na Venezuela y Merca ta habri 2025
*Problemanan Hulandes y Europeo no ta duna Aruba espacio
ORANJESTAD (AAN) —Esaki ta e ultimo edicion di DIARIO prome cu oficialmente Aruba drenta e ultimo siman di dianan di fiesta di 2024.
Cu e columna aki DIARIO a cuminsa prepara Aruba durante ultimo lunanan pa e entrada di 2025, cu lo clausura e prome cuarto parti di Siglo 21.
For di salida di Siglo 20, mundo sigur no a conoce un trankilidad pero mas bien a keda ocupa cu tur e resultadonan di Siglo 20.
Na 2025 mundo lo recorda e momentonan dificil cu el a conoce ora e pandemia Covid-19 a bati na porta y no solamente a deshaci di tur loke mundo ya a acepta como normalidad pero tambe a acelera e proceso di cambio cu Siglo 21 lo a trece riba tur tereno basa riba angustia di clima pero tambe inventonan nobo di hende, cu ta kere cu e tin universo den su man.
Aruba ta drenta oficialmente e dianan di fiesta, den un situacion cu ta exigi atencion riba diferente tereno ya cu 2025 lo no ta nada facil sigur no pa Aruba.
Dilanti porta e momento a yega pa Nicolas Maduro bolbe entrega prueba cu loke mundo henter pensa di su persona, no ta su preocupacion.
Nicolas Maduro ta prepara pa oficialmente wordo instala como Presidente di Venezuela cu alrededor di ocho Miyon Venezolano pafor di nan pais, caminda un parti a logra forma un bida nobo, pero e mayoria ta biba cu e dolornan di biba como refugiado (acepta of no acepta) na otro pais.
Pa Aruba e impacto di Gobierno Nicolas Maduro ta keda vigente cu un frontera cera entre dos pais directamente den porta di otro.
Conflictonan internacional ta latente den e region cu sigur lo mester sigui informacion cu ta bini di parti di Estados Unidos, caminda Donald Trump lo presta huramento como dirigente di Merca.
Un pakete di cambio ta loke Donald Trump a prepara pa Merca y asina pa henter mundo pero sigur pa Aruba cu un economia cu ta depende di Merca no solamente pa loke ta trata su economia basa riba turismo pero hasta e loke ta bay na candela den wea den cushina di e Arubiano.
Mientras eleccion na Aruba a exigi cambio di Gobiermo cu ta eminente bou cualkier di e dos partidonan cu a haya mas voto.
Formacion ta continua na un Aruba, cu a na man di gobernacion Wever-Croes a ricibi aplauso mundial pa su logronan.
Mester tene cu e problemanan propio di Hulanda cu no ta permiti atencion ilimita pa Aruba y tur loke Reino a entrega.
Un pais no ta depende solamente di economia y e cuminda cu e ta pone riba mesa, pero di factornan cu ta dicidi directamente pa mantencion di e caracter propio di e pais, den cual sigur e moral di e pais ta hunga un papel grandi.
Un moral cu a wordo pone na prueba durante e ultimo añanan ora corupcion a destrui politica, como e imagen di integridad cu e mester ta.
Ta hustamente e moral basico, tradicional, hancra den Arubianismo, ta exigi awor contesta firme na un punto cardinal pa e pais, cu mester conoce cambio di Gobierno pasobra e partido chikito cu a manda Gobierno cas, lo no por bolbe den Gobierno pasobra e no a haya suficiente voto.
Politica lo mester duna contesta mundialmente na topiconan serio cu hende kier lubida manera e cambio di clima cu no mester wordo atende solamente ora peliger di horcan bati na porta pero den tur circumstancia ya cu e bienestar personal di e Arubiano y di e pais, ta depende directamente di naturaleza cu a entrega Aruba su pan principal, cu ta turismo.
Con leo Aruba kier entrega su mes na turismo, ta e topico importante cu lo mester wordo discuti ora no solamente papia di economia, pero sigur di Arubianismo cu ta e base di Aruba y e formula cu a haci Aruba atractivo pa tur cu a haci Aruba nan cas.
Na entrada di e siman di fiesta kico mas ta resta pa bisa cu no ta pa yama danki pa por tabata parti di Aruba!
Paz na tur bon boluntad ta e frase di e siman nobo nos dilanti den cual e cultura Arubano lo mester prevalece pa garantisa e logronan di Aruba cu basa riba Arubianismo tabata historico den e caminata den Siglo 21!
