Ivo Valdez di OPPA ta vocifera:
*Esey ta representa 18 mil pensionado di Aruba
*Vergrijzing ta bay trece cu ne gastonan impagabel
ORANJESTAD (AAN): Diadomingo awor ta Dia di Adulto Mayor y den cuadro di esaki por ripara cu tin cosnan cu na Aruba ta keda wordo vocifera door di e organisacion cu ta representa e pensionadonan na Aruba.
Presidente di OPPA, Sr. Ivo Valdez, a duna di conoce cu den pueblo ta tende comentarionan unda ta indica cu e pensionadonan di sector publico ta pensionadonan elite.
El a bisa cu OPPA ta un organisacion di pensionado publico y nan tin hendenan cu a traha como servidor di koffie of te den oficinanan di gobierno, maestronan di scol, polis, etc y no ta pasobra e como presidente tabata maestro di scol y e ta trece e kehonan dilanti, esey kiermen cu nan ta keha pasobra kier keha.
Mester ta serio. Bay wak den supermercado con caro e costo di bida a bira. No ta pa e pensionadonan cu ta cobra un pensieon so, pero pa nos tur, a expresa.
El a agrega cu na 2019, e ombudsman nacional di Hulanda a haci un investigacion riba e islanan di Corsou, Boneiro, Isla Ariba y nan a presenta un rapport cu yama "Oog voor ouderen in Caribisch Nederland".
Ora di lesa e rapport ey ta wak con malo e situacion bao di e pensionadonan cu ta cobra un pension ta. Nan ta biba bao di loke nan ta yama e 'armoedegrens'. Na Aruba nan a bin cu un investigacion asina?, a cuestiona.
El a sugeri pa bin cu un investigacion na Aruba riba con e situacion ta bao di e 25 mil pensionadonan cu tin na Aruba.
Valdez a añadi cu 31 % di e pensionadonan (7 mil) ta cobra un pension di biehes cu ta menos cu 900 florin pa luna. 75 % di e pensionadonan ta bisa cu nan entrada no ta yega pa paga e gastonan di tur luna y esey ta representa 18 mil pensionado na Aruba, en general.
Na Aruba ta kere cu si nan ta bon, tur hende ta bon, a manifesta.
E ta di opinion cu e gobernantenan mester haci un investigacion bao di su ciudadanonan pa wak con contento nan ta. Hopi hende nan placa no ta yega fin di luna. Te hasta e trahadornan mes a keha di esaki y awor corda riba e pensionadonan cu tin un pension cu ta menos cu un salario.
Ivo Valdez a indica cu pesey ta importante pa bin cu un Foro Nacional pasobra embehecimento ta hopi grandi na Aruba y ta bay bira un momento cu e gastonan social y medico pa e grandinan ta bay bira impagabel.
Mester purba mantene e hendenan grandi mas hopi na trabao, den movimento. E ta bisa cu ban wak kico ta bay ta e resultado. E grandinan aworaki tin cu paga nan propio remedi. Gobierno a introduci na inicio di aña un suma total di 7% riba BBO, gas. gasoline, awa y coriente a subi
E cherry ariba e bolo ta e 7 % di BBO na frontera. "Unda nos ta bayendo? Poco poco ta matando e pensionadonan y pesey ta tende e gritonan aki", Valdez a declara.
