E lo ta ‘interno’ prome pa e Casinonan
ORANJESTAD (AAN): Enseñanza pa Empleo na Aruba lo start duna cursonan bek atrobe. Segun Sabine de Groot-Kwartiermaker, e siman aki mes Enseñanza pa Empleo a habri inscripcion.
E biaha aki, bo por inscribi via di online na epearuba.com y eynan mes bo por check tur e cursonan cu ta wordo duna.
A ser splica, cu pa e di dos tanda di 2022 lo bay tin curso di ‘Dealer di Casino’ tambe.
Segun señora de Groot-Kwartiermaker, e curso di Dealer aki lo bira posible danki na e sosten ricibi di varios Casino grandi na Aruba, y aki a menciona e.o. Marriott Aruba Resort y Hyatt Regency Aruba, kendenan a uni y colabora pa por haya un bon equipo pa yuda den formacion di Dealers.
E curso lo cuminza prome “interno” pa tur e Casinonan mes, y despues di esey lo habri e curso pa publico en general.
Enseñanza pa Empleo ta pensa cu nan lo kier duna mas curso cu tin di haber cu varios sector di operacion di un Hotel. Pues ademas di curso di Dealer, curso di Waiters, y curso di Bartender cu ya caba nan ta ofrece, nan ta pensando riba e.o. curso di Housekeeping, y varios mas segun e demanda di mercado laboral.
Poco tempo pasa tabatin hasta un Job Fair unda keto bay no a logra haya suficiente empleado pa cubri e vacaturanan. Enseñanza pa Empleo a indica cu nan lo bay sigui e trend di mercado laboral, y ahusta nan cursonan, segun deseo di e.o. AHATA pa focus riba e ramo y ofishi pa cual tin necesidad pa haya empleado.
Enseñanza pa Empleo ta semper excita pa e interes grandi cu publico tin pa sigui e cursonan. Segun señora de Groot-Kartiermaker, nan docentenan ta full cla pa cuminza cu e cursonan. Pa November 2022, lo bay tin varios docente nobo y nan ta cla pa cuminza.
Tur curso lo ta den nan edificio di Engelandstraat 33 na Eagle.
E cursonan ta enfoca riba ofishi di mercado laboral, y ademas nan ta trece e ‘soft skills’, pues no djis e ofishi, pero tambe e soft skills con pa deal cu colega, con pa deal cu e hefe, y tambe si ta necesario lo duna tiki ingles riba piso pa asina por comunica cu e turistanan.
Tambe lo tin curso completamente dirigi na cada idioma tambe na Enseñanza pa Empleo, tambe computer, y curso pa administracion y maneho. Por inscribi na: epearuba.com di awor caba.
