Parlamentario Setty Christiaans-Yarzagaray (MEP):
ORANJESTAD (AAN): Dialuna mainta na Enseñansa pa Empleo (EPE) na Engelandstraat a tuma lugar e develo di e logo nobo y e cortamento di cinta pa loke ta nan edificio renoba. Esaki sigur ta un ocasion pa celebra, asina Parlamentario Setty Christiaans-Yarzagaray di Fraccion di MEP a expresa.
Parlamento a wordo invita pa atende e ceremonia aki y e ta masha contento di por mira con e lema di EPE ta wordo refleha den comunidad: “Amplia bo conocemento y aumenta bo oportunidad”, locual kiermen cu esaki ta un bon oportunidad pa e personanan local bay den un proceso di capacitacion of recapacitacion pa eleva nan conocemento y oportunidadnan laboral.
El a sigui bisa cu Enseñansa pa Empleo a cuminsa na aña 1988 despues cu refineria Lago a cera. A surgi e necesidad pa introduci un manera pa prepara trahadonan miho pa e sector di turismo e tempo ey. Ainda, EPE ta traha riba esaki, amplia e conocemento y aumenta e oportunidadnan pa tur esnan cu a perde trabao, cu ta buscando trabao y / of cu kier amplia nan conocemento.
"E meta aki sigur nos ta kere den dje. Ami mes sigur a yega di ta un cursista di Enseñansa pa Empleo. Ta kere den su programanan, den su cursonan y pesey tambe nos a atende tambe, mirando e hecho cu esaki ta basa riba trabaonan di ofishi". EPE ta yuda mas y mas hende drenta mercado laboral.
Christiaans-Yarzagaray a wordo informa cu durante 2021-2022, EPE tabata tin 620 cursista y un total di 19 diferente curso. Awor, den añanan 2022 pa 2023 esaki a wordo amplia na mas di 1630 cursista cu a logra termina un di e 27 diferente cursonan. Ta aplaudi e esfuersonan no solamente di Minister Glenbert Croes cu ta esun encarga cu e departamento aki, pero tambe di e trahadonan como tambe docentenan cu aworaki ta trahando di un manera sublime.
Otro dato interesante cu a wordo comparti e dia aki ta desempleo, midi aña pasa compara cu durante pandemia. E porcentahe di desempleo tabata 8.8% y awor, segun cifranan di Departamento di Labor y Oficina di Estadistica, el a baha te na 4.3%, loke ta e porcentahe mas abou den historia di Aruba. Sigur un logro historico. Pa loke ta desempleo bou di hobennan, e Parlamentario a indica cu esaki a baha di 25.9% na 9.9%.
E dia aki por a mira entre otro con EPE ta ofrece cursonan pa esnan cu kier traha den casino, cual ta cursonan hopi interesante y cu sigur ta brinda hopi oportunidad pa traha den sector turistico cu ta e sector cu ta emplea mas hopi hende y cu tin necesidad di esaki.
Aworaki, EPE lo bay enfoca riba cursonan nobo riba tereno di energia. Den loke ta diversifica economia di Aruba, Enseñansa pa Empleo tin un rol hopi importante, a remarca. Finalmente, Parlamentario Setty Christiaans-Yarzagaray ta felicita Minister Glenbert Croes, team di EPE y stakeholders pa e tremendo logro aki.
