Minister Glenbert Croes a anuncia:
*EPE lo conoce un upgrade y actualisacion di cursonan
ORANJESTAD (AAN): Recientemente Gobierno di Aruba a apunta un ‘kwartiermaker’ pa Enseñansa pa Empleo den persona di Sra. Sabine de Groot. EPE a inicia como un Proyecto na 1988 ora cu LAGO a cera. Hopi hende a keda desemplea, pa cual motibo a inicia cu e proyecto di recapacitacion di nos hendenan pa por yega na un trabou nobo, diferente di locual cu nan tabata custumbra na dje.
Awe, decadanan despues, Enseñansa pa Empleo a haya e mesun tarea atrobe.
Durante decadanan cu a pasa, EPE a keda instrumental den re- y capacitacion di nos hendenan ofreciendo cursonan di calidad na un tarifa social. Minister Glenbert Croes lo mantene e mesun punto di salida aki pero den un bachi nobo.
E pandemia a cambia e scenario mundial cu a elimina hopi cupo di trabou. Ademas, na nivel mundial hopi funcionnan existente ta cambiando tambe, pa cual recapacitacion ta vital. Na mes momento, na nivel mundial, e necesidad pa trahado ta grandisimo.
Aki ta unda cu EPE y DPL ta instrumental.
EPE lo conoce un upgrade y actualisacion di cursonan cu ta cumpli cu e demandanan di nos mercado laboral.
Pronto lo anuncia un registracion nacional di nos hendenan cu ta buscando trabou pa registra na DPL cu tin cu cumpli cu su meta y tarea principal di pone nos hendenan bek na trabou.
Aruba mester di nos tur. Pa e motibo aki un upgrade di cursonan na EPE y un registracion nacional na DPL di buscadonan di trabou ta necesario.
E pandemia a afecta nos tur di un forma cu no por a premira. Pero awor a bira tempo pa nos recapacita y tuma rienda di nos bida bek den propio man. Tin gran oportunidad laboral eyfo. Ta e momento pa hunto pone man na obra pa e miho progreso personal y profesional.
E kwartiermaker hunto cu Departamento di Recurso Humano lo duna EPE ,cu a demostra cu e tin derecho di existencia, su formalisacion oficial den e aparato gubernamental.
