Gigante di compra online Amazon mester aumenta su tarifanan --- *Fondo Monetario Mundial y un “crisis riba crisis” Latino Americano --- *Compra online ta sigui menasa Comercio Local a pesar di tarifa nobo
ORANJESTAD(AAN)—E realidad cu ta spera mundo despues di dianan di fiesta, ta hopi diferente for di loke pronosticonan a trece dilanti pa 2022, cu mester a bira inicio di normalidad mundial despues di e pandemia Covid-19.
Informacionnan cu DIARIO continuamente a presenta pa su lectornan awor ta haya confirmacion den publicacionnan internacional durante e fin di siman di Pasco Grandi.
E Fondo Monetario Internacional a anuncia na mundo cu mester baha pronostico financiero oficial pa 143 pais, cu directamente ta un impacto di 89 porciento riba economia.
E Fondo Monetario Internacional ta papia awor un idioma cla riba e realidad di Latino America tambe cu mester lucha cu un “crisis riba crisis” manera e fondo monetario a cualifica e realidad financiero di America Latina.
E Pandemia Covid-19 no a termina manera a wordo spera y ta sigui afecta e resultadonan di economia mundial cu ta sufri pa resultadonan di Guera na Ukraine.
E seriedad di e situacion mundial sigur a bini dilanti ora e compania Amazon, gigante den compra online a anuncia, cu su tarifanan tambe mester subi.
Esaki ta nifica cu hasta productonan cu ta wordo importa sin intervencion di comercio local, ta bira mas caro.
E tendencia di aumento di prijsnan pa compra online, ta un realidad durante sigur e ultimo luna y den e situacion mundial cu a aporta na mas compra online segun cifranan ricibi.
“Compra Online ta sigui competi cu comercio local y comercio cu ta atende cu clientenan riba mercado local,” ta wordo afirma dor di informantenan.
Benta local ta keda victima di e aumento mundial y local di prijsnan cu ta haci productonan mas caro den un situacion di inflacion, cu ta afecta e placa cu publico local pero tambe turistanan tin pa gasta.
E hecho, sinembargo, cu benta online no tin gastonan cu comercio local tin, ta haci cu e prijs di benta online ta keda menos compara cu e prijs general local, ta wordo afecta dor di gastonan di entre otro hur, telefon, awa, electricidad, belasting cu un compania local na Aruba mester paga, pero no ta wordo paga pa companianan online, cu tambe a aumenta nan prijsnan seriamente.
“E forsa di compra di tur hende a baha debi na e situacion di inflacion mundial. Esaki ta crea un grupo mas grandi di persona cu no tin placa pa cubri nan gastonan, loke ta nifica cu rond mundo hamber ta propaganda su mes.
Ta hustamente hamber ta e menasa mas serio na mundo, cu na 2015 den Nacionnan Uni a traha un plan pa na 2030 yega na un mundo cu un calidad mucho mas halto di bida y un caida di hamber y miseria.
Ta trata aki di e plan pa Desaroyo Sostenibel cu resultadonan dirigi riba mehoracion social mundial a base di accion dirigi contra hamber y miseria.
Costo di bida ta sigui subi rond mundo y ta haci cu hamber y miseria ta bira un reto mundial nobo, pa cual mundo no tabata prepara.
Cifranan cu a wordo presenta durante e fin di siman di Pasco Grandi ta indica cu na Merca por ehempel, costo di bida a sigui subi y a pasa 8 porciento. Esaki ta nifica cu Merca a bolbe na e nivel mas halto di costo di bida for di 1981, cu ta tempo cu mundo tabata conoce crisis petrolero.
Expertonan local mientrastanto a indica na DIARIO, cu e hecho cu hasta companianan online, cu no tin e gastonan di comercio local a aumenta nan prijs, ta motibo pa Pueblo realisa e seriedad di e situacion cu mundo conoce.
E palabranan “crisis riba crisis” awe ta resona mundialmente den informacion oficial di instancianan financiero y economico mundial.
Importante ta tambe, cu no por pronostica cuanto tempo e actual situacion lo dura y con e por empeora.
Informantenan a indica cu den e situacion actual, e causa directo di aumento di costo di bida no ta na e pais, pero ta wordo genera dor di e situacion mundial, ta crea un dificultad mas grandi pa atende cu un situacion peligroso pa economia, situacion financiero y social.
Cu hopi preocupacion ta vigila e prijs di petroleo, cu a baha pero a bolbe subi den fin di siman.
