ORANJESTAD (AAN): Desiree Helder di Oficina Central di Estadistica a indica den un entrevista,
cu nan a keda sumamente satisfecho cu e resultado di e Encuesta di Forza Laboral (EFL 2022) cu a tuma lugar na November 2021 y tambe awor ta bay start na Juni 2022.
El a bisa cu como 7.000 persona a participa den e encuesta di forza laboral aki, y hunto cu personal di Directie Arbeid en Onderzoek (DAO) nan ta hopi contento cu e cooperacion di tur hende.
Ta asina cu cada aña, tanto Oficina Central di Estadistica, hunto cu Banco Central di Aruba y Directie DAO ta haci un encuesta di Forza Laboral, pa mira con e desaroyo ta tuma lugar den area laboral. Pesey mes nan tin bon cooperacion cu Departmento di Labor, como cu gran parti di e cifra aki lo bay pa nan maneho. Oficina Central di Estadistica tin deseo pa haci esaki kizas mas cu un biaha pa aña tambe.
Normalmente e costumber ta pa trata di haci e encuesta aki na 2.000 hogar na Aruba, cu ta cubri asina como 4.000 hende. E biaha aki a tuma un ‘sample’ mas grandi debi cu kier mantene e esaki pa añanan venidero ora di haci e encuesta.
Segun Helder, nan tin meta di mantene e cantidad di hende aki pa un periodo di 3 aña, y di e forma ey cada biaha cu haci calculo, y yama mesun lugarnan bek, nan haya mesun cantidad di hende atrobe pa e encuesta, pa asina nan nan por haci un mihor calculo pa cu e cifra di desempleo.
Encuesta via telefon y email: Awor na 2022 e situacion ta mas moderno, y e Encuesta di Forza Laboral (EFL) aki ta bayendo na un forma mas rapido y simple. Segun Desiree Helder, e biaha aki a haci uso di telefon, y tambe di comunicacion via email pa e proceso di encuesta.
Pero toch nan tin plan pa sigui subi caya pa haci otro encuestanan, y e cooperacion keto bay tey. Pero e proceso di bishita cas pa cas, lo por bay bira menos.
Esey ta bin debi cu e trend internacional tambe ta similar! Esta cu poblacion ya “no tin tempo” pa participa na un encuesta. Pa colmo desde e pandemia, ya no ta tur ciudadano ta cla pa acepta kende cu ta drenta nan cas.
“Pesey nos ta busca otro metodonan tambe pa acerca hendenan pa por coopera mihor,” Helder di Oficina di CBS a indica. Pesey pa e Encuesta di Forza Laboral, nan ta yamando hendenan cu a coopera cu e Encuesta di 2021, y lo manda email pa esnan cu a coopera, pa check si kier yuda awor na 2022 tambe.
Pa e encuesta aki, ta haci uso di guia di International Labour Organisation, cu ta mustra cu tin di haci esaki cerca tur hende di 15 aña di edad bay ariba. Nan ta considera hendenan di 15 aña bay ariba di ta forma parti di mercado laboral. Pues pa Aruba por usa su cifranan segun acuerdonan internacional, tin di inclui hobennan di 15 aña bay ariba tambe den esaki.
