ORANJESTAD (AAN): Dia 15 di November 2023, Oficina Central di Estadistica (CBS) a cuminsa cu e Encuesta di Entrada y Gastonan.
Manera nos a menciona e Encuesta di Entrada y Gastonan ta encera 2 parti:
- Hogarnan participante lo wordo puntra pa contesta algun preguntanan tocante gastonan cu e hogar a haci durante e 12 lunanan cu a pasa prome cu e encuesta aki
- Hogarnan participante lo wordo pidi pa yena un Buki di Gastonan Diario. Den e buki aki tur gasto di tur miembro di e hogar mester wordo yena pa un periodo di 2 siman.
Teniendo na cuenta e esfuerzo cu un hogar mester haci pa e encuesta aki, CBS a logra bin cu un incentivo pa hogarnan participa. Hogarnan cu a participa completo na e encuesta aki y a duna nan number di telefon pa asina nan por participa pa gana un incentivo cu ta un bon di supermercado na balor di Afl.100
CBS ta anuncia e ganadornan di periodo 11 y 12 y alabes ta mantene e anonimidad di e hogarnan ganador. E 10 hogarnan ganador pa periodo diesun cu a tuma lugar den luna di september/october 2024 ta parti den e siguiente areanan di Aruba: den Noord 2, den Oranjestad 5, den Santa Cruz 1 y den Savaneta 2.
E 10 hogarnan ganador pa periodo diesdos cu a tuma lugar den luna di october/november 2024 ta parti den e siguiente areanan di Aruba: 3 den Oranjestad, 2 den Santa Cruz, 3 den Paradera, 2 den San Nicolas y 1 den Noord.
Encuesta di Entrada & Gastonan a yega su final
Despues di un aña largo, e Encuesta di Entrada & Gastonan 2023-2024 a yega su final. CBS kier a gradici tur hogar pa nan esfuerzo pa completa e cuestionario y yena e buki di Gastonan Diario y tambe na e 28 encuestadornan cu a bishita 2,047 hogar cu a duna nan bon cooperacion durante e encuesta.
