Lo stop den Pasco te Aña Nobo y na Januari lo sigui:
ORANJESTAD (AAN)—E Relacionista Publico di Central Bureau Statistiek (CBS), Damara Rasmijn, den entrevista cu DIARIO a menciona cu e prome periodo di e encuesta di “Entrada y gasto 2023-2024: Na unda mi placa ta bay?” a keda cla cu e prome periodo cu tabata na November.
El a agrega cu actualmente nan ta bezig cu entrevista na hogarnan te fin di otro siman, pasobra nan ta stop pa e temporada di Pasco y Aña Nobo, y na Januari 2024 nan lo sigui.
Damara a bisa cu e encuesta ta bayendo bon, yena e cuestionario riba su mes ta bay lihe, pues nan tin chens di busca informacion cu e entrevistadonan mester, y hunto cu e tellernan, nan por yen’e parti pa parti.
Den e parti di e Buki di Entrada y Gasto, ta esun cu ta tuma un tiki mas tempo, pasobra mester yen’e dia pa dia, pero claramente ta depende di kico e hogar ta prefera, Damara a splica.
“Tin un par di hogar cu ta warda nan recibonan y hunto cu e tellernan ta yen’e y tin di nan ta yen’e nan mes. E parti di recibo si ta un tiki dificil pasobra no tur ora ta describi kico e productonan ta. E consumidor ta haya un bedrag di producto A, producto B pero bo no sa kico nan ta. Pero mester di e hogar pa yena esaki, pero un bez cu ta recibonan cu tin tur e informacion manera mester ta, ta bay hopi mas facil.
Generalmente ta e cabes di famia ta yena e informacion, pero cada miembro di e famia individual tambe por yena su entrada, gastonan y otro datonan cu kizas ta e so conoce.
Finalmente, Damara a informa cu nan a logra di haya un incentivo pa e hogarnan cu ta colaborando, loke normalmente nan no ta haci, pero teniendo cuenta cu e encuesta aki ta exigi mas di un hogar, locual nan ta haci ta cu cada luna ta bay rifa diferente bond di supermercado, locual ta anonimo.
CBS mes ta contact e persona directamente y si e hogarnan kier participa den esaki nan ta purba encurasha pa participa den esaki, Damara a indica. Esaki ta enfoca riba e hogarnan cu ta completa e encuesta y yana full e Buki di Entrada y Gasto diario.
