ORANJESTAD (AAN): Durante su bishita oficial na Hulanda, Prome Minister mr. Mike Eman a reuni diahuebs merdia cu escritor y
ex-periodista politico Hulandes Hans Verbeek, autor di e buki “De Vergeten Minister-President”. Durante e encuentro, a intercambia pensamento riba historia politico, liderazgo y e importancia di preserva e legado historico cu a forma Hulanda y Reino Hulandes.
E buki “De Vergeten Minister-President” ta relata e bida y carera politico di Gerrit Schimmelpenninck (1794-1863), e prome minister-presidente di Hulanda. E publicacion ta ofrece un perspectiva mas profundo riba e debate constitucional rond di 1848 y e rol cu Schimmelpenninck a hunga den e periodonan decisivo den historia politico di Hulanda
Segun Verbeek, e buki ta busca amplia e comprension historico tocante e diferente visionnan politico cu tabata existi durante e tempo ey. Hans Verbeek, kende anteriormente a traha como periodista politico na Den Haag y coresponsal den exterior, actualmente ta trahando p’e provincia Overijssel. Su investigacion ta basa riba diferente fuente historico y diplomatico cu no tabata uza anteriormente.
Como señal di aprecio durante e encuentro, Prome Minister Mike Eman a entrega Hans Verbeek un copia di e buki “Volk van Veerkracht” di Luc Alofs y Rene Zwart. E publicacion ta relata e historia di resiliencia, perseverancia y fortalesa di pueblo Arubiano, y ta mustra con Aruba a logra desaroya su mes identidad y capacidad pa supera diferente reto durante generacionnan.
