Minister Geoffrey Wever
ORANJESTAD (AAN): Como parti di un serie di Town Halls cu diferente organisacionnan y gremionan den nos comunidad, Minister di Finansa, Asunto Economico y Sector Primario, mr. Geoffrey Wever, a reuni cu Camara di Comercio (KVK) y su miembronan pa comparti informacion y dialoga tocante e Rijkswet houdbare overheidsfinanciën (HOFA) y e Landsverordening waarborging houdbare overheidsfinanciën (LWHO).
E meta principal di e serie di Town Halls aki ta pa crea un espacio informativo unda informacion corecto y transparente ta wordo comparti, y unda tin oportunidad pa pregunta, dialogo y intercambio di opinionnan. E encuentro cu KVK a brinda un oportunidad valioso pa discuti e implicacionnan di ambos ley y nan posible impacto positivo riba Aruba su futuro financiero.
Durante e sesion, Minister Wever a splica tocante e advies cu a sali recientemente di Raad van Advies, y adresa e preguntanan concerni di Articulo 38. Tambe, a comparti cu e miembronan di KVK con e introduccion di Rijkswet HOFA por contribui na un reduccion significante den e costo di financiamento di Aruba. Actualmente, Aruba ta paga un interes di aproximadamente 6.9% riba e prestamo COVID cu Hulanda. Cu implementacion di HOFA, e interes ey por baha te alrededor di 3.5%, resultando den un reduccion di Afl. 128 miyon den interes pa e prestamo eynan.
Ademas di esey, Aruba tin diferente prestamonan riba mercado internacional cu actualmente ta carga un interes promedio di aproximadamente 6.5%. Hulanda a indica cu tin disposicion pa refinancia e prestamonan aki tambe na unpercentahe abou di 3.5%. Como resultado, Aruba por realisa un reduccion adicional di gasto di interes di aproximadamente Afl. 366.5 miyon.
Segun Minister Wever, e beneficio di e reduccionnan aki ta concreto y directo pa comunidad. Locual cu gobierno di Aruba ta salba na interes, lo wordo aloca pa inversionnan cu tin impacto directo riba calidad di bida di cada un di nos ciudadanonan. Esaki por inclui inversionnan den infrastructura, mehoracion di camindanan, scolnan, transporte publico y otro prioridadnan importante pa desarroyo di Aruba y su hendenan. Ta importante pa enfatisa cu Aruba ta mantene e control di unda y con ta dicidi di inverti e placa bek den comunidad, Hulanda no.
E encuentro cu KVK a caracteriza pa un dialogo habri y constructivo, unda miembronan di e sector comercial a haci varios pregunta y a comparti nan punto di bista tocante e tema.
Minister Wever a expresa su gratitud na KVK y su miembronan pa nan participacion activo y e intercambio productivo di ideaonan. E serie di Town Halls ta continua cu otro organisacionnan den comunidad pa asegura cu pueblo di Aruba tin acceso na informacion corecto y oportunidad pa participa den e conversacion tocante nos futuro financiero.
