Parlamentarionan Thomasia y Kelly:
ORANJESTAD (AAN): Miembronan di fraccion di AVP, Otami Thomasia y su colega Dennerich Kelly a participa e siman aki den un encuentro constructivo cu Sindicato di Maestronan di Aruba (SIMAR) cu a enfoca riba intercambio di idea y propuesta di solucionnan concreto den e area di enseñanza.
Durante e reunion, un di e puntonan principal cu a trata tabata tocante salario y pago den sector di enseñanza. Na april 2024 SIMAR y e gobierno anterior a firma un acuerdo tocante aumento di salario cuminsando 1 di januari 2025. Parlamentario Thomasia, kende su mes ta un docente di profesion, a indica na e sindicato di lo bay informa su mes mas tocante e status di esaki ya cu e ta kere cu gobernacion ta continuacion.
E punto aki, hunto cu otro reto cu ta profesionalnan di enseñanza ta enfrenta, a discuti abiertamente. Thomasia a indica cu, como representante di pueblo, e kier dialoga cu e sector pa asina por haya e informacion directo y posteriormente haci pregunta relevante na e minister encarga pa haya un respuesta oficial.
Thomasia: “E sesion aki tabata hopi fructifero, nos a logra intercambia idea, propone solucion y traha na manera constructivo,” Thomasia a bisa. Segun e parlamentario, e reunion a reafirma e importancia pa sigui mantene un relacion positivo cu tur actor den e tereno, cu respet y habri pa logra solucion oportuno.
Di su banda, parlamentario Kelly a enfatisa cu “mester sigui traha hunto, pasobra mi papel como parlamentario ta pa representa pueblo y duna nan voz. Den union nos por logra e miho resultado pa enseñanza y pa bienestar di nos scolnan, maestro y famia.”
E encuentro a termina den un tono agradabel y constructivo, cu compromiso pa sigui traha na base di cooperacion y dialogo. Ambos parlamentario di AVP ta kere cu ta esencial pa tene e canalnan di comunicacion habri, pa cada desafio por bira un oportunidad pa mehora.
