Suplica pa Gobierno nobo pone ordo bek eyden! - ORANJESTAD (AAN): Trahadornan na Parke Arikok ta convenci, cu directiva a haci uso di e pandemia rond di Coronavirus pa asina retira trahadornan.
Y pa sorpresa di nan tur, awor diripiente nan ta habri solicitud pa trabao atrobe.
Nan no ta compronde ta kico esnan cu ta dirigi e Parke ta haciendo. Algun luna pasa tabata parce comosifuera nan ta masacrando e Parke, y awor ta haciendo net lo contrario.
E trahadornan no ta compronde con e persona cu ta C.C.O. eyden cu e mes a traha un titulo pe, nunca a biba na Aruba, pues con e por sa algo di naturaleza di e isla. Ta den Dierentuin el a traha na Hulanda.
Tambe tin cu ta dirigiendo cu tin riba di 70 aña di edad caba, y envez di bay descansa su curpa, ta haciendo cosnan raro cu e Parke.
E trahadornan ta convenci cu SVb tin di controla di con nan ta haya loonsubsidie, mientras cu entrada di Parke a subi considerablemente halto y ta haya output-subsidie di Gobierno tambe. Y awor ta parce cu ta via Uitzendbureau ta busca trahador atrobe pa bin yuda eyden.
Hecho ta cu e trahadornan ta notando cu hopi turista ta bishitando Parke Arikok bek atrobe. Esey nifica cu tin mas entrada ta drenta, aunke nan no tin hopi empleado mas pa paga salario, pero managers si tin hopi.
Nan ta haya cu Gobierno tin di check,di con awor nan kier paga full e vakantie-uitkering completo pa e managers haya double-salario, mientras cu otro fundacionnan ta pasa den duro.
Y awor ta mirando con hasta managers mes ta kehando contra otro, esta cu uno ta traha 8 ora of mas pa dia, mientras tin otro cu ta cana rond, sin haci net nada pero toch tin salario astronomico. Y den fin di siman? Bo no ta haya ni un manager na Parke Arikok. Tampoco riba dianan di fiesta, of ora di cualkier emergencia riba teritorio di Parke.
Tur esaki a pone cu awor trahadornan di Parke Arikok ta tur disgusta, principalmente e hecho cu ta un ‘outsider’ ta dirigiendo Parke. Pesey nan ta spera cu Partidonan Politico cu ta preparando pa eleccion y posible forma Gobierno nobo, pa nan tene cuenta cu loke ta pasando na Fundacion Parke Nacional Aruba. Djis pa nan prepara pa bin topa cu algun dirigente den Parke cu ta bisa semper cu boca gradni cu ta nan ta manda den Parke, y cu ningun sorto di Gobierno no tin nada di bisa.
Pesey mes e trahadornan ta spera cu e Gobierno nobo pone ordo den Parke Arikok prome cu ta laat.
