ORANJESTAD (AAN): Despues cu negociacionnan a ser haci y cu pakete nobo a ser ofreci door di gerencia di NV Elmar,
e ora Sindicato STA como debe ser a trece tur esaki pa e miembronan pa asina nan analisa e oferta y paketenan, y finalmente vota si acaso ta acepta esey of no.
Diego de Cuba di Sindicato STA a bisa cu den penultimo reunion cu nan tabatin cu empleadonan, nan a expresa nan deseo pa bin cu algun cambio mas den e oferta pa cu e CAO nobo, y e mensahe ey a wordo transmiti pa gerencia di e compania di electricidad. Gerencia a dicidi na bay studia e cambionan aki, y despues a trece contesta.
Sindicato STA na su turno a hiba e mensahe aki pa empleadonan, y laga nan vota. Durante e votamento, e mayoria cu ta mas di 2/3 parti a vota na fabor di loke tin riba e mesa.
“Esey nifica pues cu e CAO nobo na NV Elmar lo bay conoce bida,” de Cuba a indica na DIARIO den un entrevista.
El a refleha riba e lucha largo pa establece un CAO nobo, bisando cu esaki no tabata un trayecto facil, tabata uno dificil unda cu a confronta problemanan hopi bastante turbulento, y bon mes cu a yega na e capitulo final. E ta mira cu e siman aki mes probablemente nan lo ta firmando e Contract Colectivo nobo pa empleadonan di NV Elmar.
E trayecto di e structura salarial nobo no tabata djis un hubada den wowo di Sindicato so, sino den wowo di trahadornan tambe. Pero apesar di esey, nan a logra sobrepasa e problema aki hunto cu e empleadonan y gerencia di NV Elmar.
E dificultad pa cu e pensioen existente cu tabatin, tur hende sa cu e pensioen cu Elmar tabatin antes a bira demasiado caro, no djis pa e compania sino pa e trahadornan tambe, y premirando cu e lo bay bira mas costoso den futuro cercano, a dicidi pa transferi pa un otro fondo di pensioen y den e caso aki e fondo di pensioen cu tabata mas aplicable den wowo di Sindicato y tambe gerencia, ta di APFA, y tur e negociacionnan a wordo haci, y esey tambe a wordo regla pa sigura e futuro di trahadornan y nan pensioen.
Encuanto e CAO nobo mes, Diego de Cuba a indica cu e empleadonan di NV Elmar a conoce un adelanto, tanto den e beneficionan secundario, mayoria di nan a conoce aumento. Den su totalidad, e CAO ta hopi bon cu tur ingrediente necesario pa un contracto colectivo tin.
“Mi kier a felicita e trahadornan di NV Elmar tambe pa e contract colectivo nobo aki cu nos lo firma den dianan venidero,” de Cuba a bisa. Sindicato STA a boga pa e CAO aki wordo traha na idioma Papiamento, y e ta algo cu e Sindicato ta haciendo pa algun tempo caba, como cu e ta mas facil pa e trahadornan compronde. Pasobra tin hopi CAO na Ingles y Hulandes, cu ta mas complica pa e yiunan di tera.
