Anselmo Pontilius, Mediador:
ORANJESTAD (AAN) – Den entrevista cu Mediador, señor Anselmo Pontilius, den e Congreso di Adulto Mayor, el a menciona cu e embehecimento den e poblacion di Aruba, ta un instrumento mas pa atende, cu caracter nacional.
Na e momento aki Aruba tin 110.000 habitante di cual, alomenos 20 mil, ta riba 60 aña caba. Riba su mes, e no mester ta un problema, pero embehecimento ta un problema mundial den cual tin tratadonan caba, con pa atende cu esaki, y Aruba no ta un excepcion. Pero si por nota cu e problema ta hopi mas grandi cu nos a kere cu e ta.
Pontilius a expresa cu “por ehemplo na e momento aki tin un lista di minimo 200 cliente cu ta wardando lugar pa keda. Y si haya mes lugar pa keda, no tin suficiente personal califica pa traha eynan. Eynan tin caba e aspectonan serio. Ban wak un rato e transporte pa e personanan di tercer edad, cubrimento di remedi cu no ta wordo cubri mas pa AZV. Pues, un di nos proposicionnan ta pa crea un fondo urgente, pa atende cu esaki. Un fondo di por lo menos 15 pa 20 mil miyon florin y tin varios proposicion di con pa haci’e”, Anselmo Pontilius a indica.
E fondo aki mester ta structural. No pa un momento, pa por yuda resolve of alomenos alivia e situacion. “E ta un tarea pa termino medio y largo, den cual Parlamento y tur gobierno cu sinta, tin cu percura pa tin solucionnan urgente aworaki, manera lugar di keda, por ehemplo. Camber ta un problema serio, no tin na lugarnan existente, lugarnan priva si nos por yame asina. Na mesun momento educa nos mes na tal forma, como trahado hoben aworaki, con mi ta prepara pa futuro”, Pontilius a acentua.
El a agrega cu tin cantidad di ciudadano cu a traha 30 pa 40 aña y ora nan ta haya nan pensioen di behez, y eventualmente un pensioen adicional, of si nan bay traha, belasting ta dal nan durisimo, pero directora di Estadistica ta bisa cu un hende sin 2.500 florin den su man pa luna, ta den problema.
Esaki ta temanan cu mester bin riba mesa, pasobra e ta un problema nacional y tambe na nivel nacional tin cu presenta solucion.
