Audrey Croes, Relacionista Publico NV ELMAR:
ORANJESTAD (AAN) – Relacionista Publico NV Elmar, Audrey Croes, den entrevista cu DIARIO a elabora tocante e esfuerzonan cu e compania ta haci den e temporada di mas calor, cu ta for di juni te mitad di september, aunke ultimo tempo, nan ta observa luna di mei y te mitad di october.
No obstante, e ultimo lunanan por mira cu na comienzo di Mei te cu mitad di october, tambe tin calor extremo y su efectonan tambe ta wordo sinti.
“Na 2023, nos a haya un 'heat wave', no spera na mei. Claro, e ora ey, nos ta considera luna di mei como un periodo cu tambe nos tin cu vigila. Pues pa cu esaki, durante e periodo tin diferente cos cu nos ta haci. Nos ta haci esfuerzonan underground, kiermen kabelnan bao tera, unda cu e tecniconan ta inspecciona tur e cabelnan pa wak e load y na momento cu e load ta mas halto cu nos ta desea, nos ta transferi esaki riba otro kabel. E grid di ELMAR ta hopi flexibel. Esey kiermen cu tur punto di casita di coriente, of mayoria, tin dos kabel di coriente. Kiermen, si tin un asunto pasando cu un cabel, nos ta transferi e coriente na e otro kabel”, Audrey Croes a señala.
El a agrega cu aña pasa ELMAR a cambia su estrategia durante e temporada di calor, cu nos a parti e load entre ambos kabel. Anto, esaki a yuda ELMAR grandemente durante e temporada. “Compara cu 2023, nos a experiencia mas reto durante e temporada di calor cu 2024. Esaki ta un di e cosnan cu nos ta haci. Awor, pa locual ta 'under heat', liña di coriente, tambe tin esfuerzonan unda cu nan ta midi e voltahe, y unda cu ta necesario nan ta nan ta instala transformer riba e palo di coriente. Pa e ora ey nos a aumenta e capacidad”, Audrey Croes a indica.
Kiermen, esaki ta dos esfuerzo cu ta wordo haci “underground” y “overheat” cu ta wordo haci den henter aña pero specialmente den temporada di calor, y e aña aki no lo ta diferente.
“Pero si, acerca, e aña aki nos a instala mas sensors riba e liñanan di coriente, unda cu nos por haya un miho bista riba kico tin riba nan, anto e ora ey instala transformers. Esaki ta un trabao continuamente, pero bo ta prepara p’e sigur, pa e temporada di calor”, Audrey Croes, Relacionista Publico di NV ELMAR a señala.
