E ta algo simple pa compronde
ORANJESTAD (AAN): Den un declaracion emiti riba video, e compania NV Elmar a duna informacion riba e acuerdo di termino pa cambia e tarifa, y e motibo tras di e cambio di tarifa aki.
A mustra cu aña pasa na Juli 2022, Ministro Geoffrey Wever, riba conseho a duna aprobacion temporario pa subi tarifa di coriente. E aprobacion temporal aki tabata periodo di evaluacion di minimo 6 luna, pues no e maximo di 6 luna manera ta wordo bisa. Aumento di tarifa na 2022 tabata debi cu WEB no por a sigui carga e aumento drastico di su gastonan, y mester a subi nan prijs di benta di coriente na Elmar. Pues ta importante pa compronde, cu cu Elmar ta cumpra electricidad for di WEB.
Pa por baha tarifa di coriente, WEB mester baha nan tarifa di benta di electricidad na Elmar. Esaki ta importante pa e comunidad di Aruba por compronde e relacion entre e dos companianan aki.
Pues WEB tin di bay den proceso pa evalua y mira si por bin un rebaho di coriente. Nan tin di determina si tin espacio pa cambia nan tarifanan. Elmar a admiti cu nan ta manda carta pa Ministro riba e asunto aki, y cu di berdad tin un diferencia di opinion riba e cuestion di minimo/maximo 6 luna aki. Ultimo carta cu Ministro Wever a manda dia 28 di Maart, ta indica cu Elmar tin te cu Diabierna merdia 12:00 pm pa traha riba un proposicion bon balanza pa ahusta e tarifanan.
Elmar ta haya esey un tarea dificil, como cu nan ta depende di e prijs di benta di coriente di WEB. E companianan a tene diferente reunion na Utilities Aruba NV, ultimo dos luna, a papia riba e tema aki hunto cu Ministro Glenbert Croes y WEB Aruba NV pa mira ki opcion nan tin pa baha coriente.
Elmar a pidi WEB pa haya mas claridad lo mas pronto posible teniendo cuenta cu e carta di Ministro Wever. Pues mester haya sa rapidamente kico e prijs di coriente lo bira.
Diahuebs den dia, Robert Croes di WEB a informa Elmar cu ainda nan ta trahando riba esey. Elmar ta corda tur hende cu e proceso di baha prijs no ta algo facil, y no por socede di un dia pa otro. Y tampoco di parti di Elmar solamente.
E modelo di negoshi di Elmar ta basa riba un net-profit di 10 miyon Florin pa aña. Esaki ta pa garantiza continuacion di operacion di Elmar. Un otro dato a worde presenta den e video ta e hecho cu 80% di benta di coriente ta worde usa pa paga WEB. Ademas, lo tin informacion tocante e ganashinan cu Elmar ta ricibi, y loke e compania di electricidad ta haci cu e ganashi aki pa cubri e trabaonan di mantencion y proyectonan di expansion riba e grid di coriente.
Si acaso WEB no por baha su tarifanan, y si acaso Ministro obliga Elmar si pa baha tarifanan, lo bay tin consecuencia severo pa e compania di electricidad.
Finalmente, e video ta trata tambe e responsabilidad riba e fianzanan di e companianan di utilidad na Aruba.
