Ryçond Santos do Nascimento Parlamentario independiente
E victoria abrumado di PVV di Geert Wilders cu ± 37 asiento ta demostra cu pueblo di Hulanda ta cansa di e politica tradicional. Un logro impresionante pa Wilders, despues di un lucha cu a tuma hopi aña. El a cuminsa haya mas y mas forsa e ultimo añanan ora e partidonan tradicional a perde tur coneccion cu e Pueblo Hulandes. Un avalancha di imigracion cu impacto riba e custumbernan tradicional di Hulanda a resulta di ta un preocupacion grandi.
E toeslagenaffaire tambe tabata desastroso pa politica tradicional. Bao instigacion politico Departamento di Impuesto Hulandes a acusa miles di mayornan falsamente di fraude. E manera agresivo cu Departamento di Impuesto a actua contra e mayornan a causa problemanan financiero y emocional pa e famianan afecta. Pieter Omtzigt di NSC (Nieuw Sociaal Contract), e otro ganador electoral (± 20 asiento), ta un figura cu a demostra curashi contra su mesun gobierno y su mesun partido y awe e ta yabi pa forma e gabinete nobo.
Wilders y Omtzigt a hiba un politica fuerte y al caso
Den cierto forma Geert Wilders y Pieter Omtzigt ta sigui e tradicion di Pim Fortuyn cu a hiba un politica fuerte te dia cu el a wordo asesina. E victoria a mustra cu e politica di manipula mester caba y e pais mester reforma. Tin hende tin miedo cu Hulanda lo bira extremadamente derechista, pero esey no ta e caso, pasobra Forum voor Democratie (FvD), JA21, Belang van Nederland (BVNL) tur a bay atras den asiento. Pueblo Hulandes a demostra un preferencia pa un PVV revolucionario pero civilisa. Ta interesante pa mira si Wilders lo logra su meta di bira minister-presidente di un coalicion derechista di PVV, VVD y NSC.
Pa Aruba positivo, pa berde-geel negativo
Pa Aruba como pais e resultado aki ta positivo, pasobra Hulanda lo forsa reformanan necesario, pa nos ta mas stabil economicamente. Autonomia no lo cambia, pasobra ta Statuut ta determina e scope di nos asuntonan interno. Pa partidonan tradicional un coalicion asina si lo ta un nachtmerrie. Tanto Berde como Geel ta biba di un populismo izquierdista y un coalicion derechista por resulta hopi duro pa nan. Pieter Omtzigt a demostra den pasado cu combati corupcion ta un prioridad grandi p’e. P’esey por spera refuerso den Ministerio Publico pa por persigui criminalidad politico den un forma mas eficiente.
Tambe por spera un enfasis ainda mas grandi riba responsabilidad fiscal y un bon administracion financiero di pais, locual ta bay linea recta contra e filosofia di e partido berde. Pa partidonan cu tin capacidad y ta mira Hulanda como aliado esaki ta un tempo unico. Partidonan cu kier mira un transformacion di Aruba den un pais hopi miho organisa, cu un nivel di bida hopi mas halto, cu cuido y educacion di nivel halto, esaki ta un tempo cu ta inspira speransa den un transformacion radical di nos isla.
