Celebracion 40 aña Status Aparte na 2026 mester entrega mundo e contesta
*Retonan dificil den Reino y na mundo no ta permiti fantasia politico
*Instabilidad petroleo, cambio di clima y revolucion mundial ta spera
ORANJESTAD(AAN)—E hecho cu Reino Hulandes ta exigi continuacion di e actual bon maneho di Gobierno Evelyn Wever-Croex, no ta algo nobo di Reino pero ta coresponde directamente cu e miedo di Reino y mundo, pa loke por a socede cu Aruba den un Status Aparte cu un gobernacion manera tanto pais cu a haya nan independencia of autonomia a conoce.
E grito di Aruba pa autonomia a tuma lugar durante un epoca mundial den cual mundo tabata deshaci di gobernacionnan produci pa e era colonial.
Si mira atras por nota con entre otro den region di Caribe, paisnan a reclama nan propio gobierno y a deshaci di pasado.
E resultado di independencia marca pa agitacion politico pero sin politiconan cu tabata capaz pa maneha nan pais, awe ta entrega na Nacionnan Uni problema serio a base di e resultadonan di mal gobernacion bou of despues di dictadura cu loke a wordo yama “republicanan di banana”a produci.
E obstaculo grandi cu Betico Croes a enfrenta den su lucha pa e concepto nobo di autonomia cu el a presenta den Status Aparte tabata, e miedo cu Aruba lo no por a para riba su propio pianan riba tereno financiero, loke a conduci na pasashinan den Statuut cu Hulanda ta mantene su derecho pa exigi bienestar di e poblacion di paisnan forma pa ciudadanonan Hulandes.
Betico Croes no a muri Status Aparte, pero a laga atras pa Aruba cumplimento di su promesa y trabou di su team, cu a resulta den banki den Oposicion ora e logro di Betico Croes a worde kita (pa uza un palabra suave) for di Betico Croes.
E acuerdo logra entre e team di Betico Croes y Hulanda, no tabata tin participacion sikiera di loke tabata oposicion di Aruba y di e pakete di Betico Croes.
Aruba no a bay Mesa Rondo na un forma uni, pero na un forma cu e oposicion di e tempo, no a acepta Betico Croes y su team.
Pero ta e logro di Betico Croes y su team a wordo uza pa oposicion contra Betico Croes, por a bira Gobierno na Aruba na 1986 ora hipoteca a bira inicio di e drama financiero di Aruba cu a culmina cu intervencion Hulandes na 2014, ora Aruba tabata bancarota manera Hulanda a mustra.
Awe Aruba ta prepara pa bay urna electoral na un momento historico.
E pais cu Hulanda a pone na 2014 bou gobernacion di Mike Eman bou supervision, na e momento aki ta cosecha aplauso rond mundo.
Gobierno Wever Croes a transforma e desaster financiero di 2017, ora segun Secretario di Estado Knops ya Aruba tabata bancarota, den un situacion gubernamental ehemplar na mundo.
Aruba ta centro di aplauso pa e gobernacion cu e pais a hiba bou gubernacion di Evelyn Wever-Croes, den situacionnan di pandemia, recesion, guera mundial.
E proceso democratico mester sigui su rumbo y ta habri porta pa e problema mas grandi di democracia, cu a manifesta su mes na 1986 ora a deshaci di Betico Croes como lider cu a logra Status Aparte, pa asina oposicion haya poder y finalmente destrui e base financiero di Aruba.
Kico e temor grandi ta na e momentonan aki?
Aruba atrobe bou gobernacion di Prome Ministro Evelyn Wever-Croes, a conoce un logro historico a base di un gobernacion serio.
Si e gobernacion aki no continua, kico lo pasa cu Aruba cu awe no por conta cu tur e beneficionan cu tabata tin hasta despues di Covid-19.
Na e momentonan aki petroleo no ta crea stabilidad economico mas na mundo, pero hasta a bira motibo di instabilidad cu un prijs cu ayera atrobe a bah
Si e situacion di petroleo ta pusha mundo den incertidumbre, guera y mas guera ta e panorama mundial, mientras clima ta amenaza hende.
Un mundo na crisis ta e planeta di cual Aruba tambe ta forma parti mescos cu Hulanda cu problemanan politico serio.
Na e momentonan aki Hulanda mester di tur su conocemento y rikeza pa enfrenta un situacion di cambio total pa asina Hulanda por sobrevivi su situacion financiero y hasta salario di Rey mester baha.
Sonido di guera ta mas fuerte cu nunca y problemanan ta culmina.
Aruba ta bay eleccion cu sigur no mester di politico cu mester di puesto den Parlamento pa nan por subi nan escalera personal, pero manera Reino ta splica, lidernan cu por garantisa continuacion di un bon gobernacion.
Experencia politico di pasado, ta e preocupacion mas grandi pa futuro di Aruba, cu por perde tur loke el a logra, si e cay den e rio di caymannan cu kier puesto y Hulanda mester atende su propio asuntonan urgente y mundo ta den crisis.
Democracia real despues di 2024 lo depende di e decision di Pueblo riba e calidad di gobernacion cu e kier.
Aruba lo bolbe na un lider cu ta muri di hamber of lo continua na man di un lider capaz pa yama su mes dirigente y cu mundo ta aplaudi?
