ORANJESTAD (AAN) – Den su calidad di director di AZV, Edwin Jacobs a hiba palabra durante e Ceremonia di e Acreditacion JCI (Joint Commission International Accreditation) Instituto Medico San Nicolas (ImSan).
Jacobs a bisa cu e Organo Ehecutivo di AZV, cu hopi atencion y sigur cu confianza, a sigui henter e proceso di acreditacion di ImSan.
“Y di con cu confianza? Pasobra manera Dr. Joel Rajnherc a relata awo eynan ImSan a demostra den tempo, cu di e tin un team dedica, un team determina, y un liderazgo di persevera cu ta ingredientenan necesario pa exito. Y di parti di e Organo Ehecutivo di AZV ta un placer y un honor di ta presente na ocasion di un momento asina historico pa Aruba, y pa nos region”, Ir. Jacobs a subraya.
Director di AZV a felicita InSam, su team, su director y e Hunta di Supervision na un manera grandi.
“Pero tambe mi kier haci uso di e oportunidad pa gradici ImSan pa ta un parti strategico di AZV como Seguro, pa brinda e comunidad di Aruba y nos aseguradonan e servicionan cu nos tin mester.
Den e ultimo dos aña y pico cu mi ta na AZV, na ki momento cu nos ta den apuro y nos bati na porta di ImSan, semper e ta habri pa yuda nos busca solucion”, Ir. Jacobs a señala.
Director di AZV a ilustra esaki, mencionando e di tres turno di Dialisis, e Hearth Arts Post, e docter di cas bao un dak, y pa ultimo, AZV tabata tin mester di un ayudo pa licitacion cu nan tin pa cumpra di servicio na Colombia, y eynan tambe ImSan a pone su colaboracion na disposicion di AZV. Ir. Jacobs a expresa palabranan di masha danki y a entrega, den nomber di e Organo Ehecutivo di AZV un reconocemento na ImSan, como un partner estrategico y valioso pa AZV.
