Ruzischka Tromp, di Profesionalizacion ta relata:
ORANJESTAD (AAN)- Manera ta conoci, di dia y pa 8 di October aki, SKOA ta organizando su actividad di Desaroyo Profesional, “EduWeek 2026.
Den un entrevista cu DIARIO, Ruzischka Tromp MSc, Afdeling Professionalisering (Departamento di Profesionalizacion) di SKOA, a elabora tocante e Workshopnan, cu ta tumando lugar e siman aki.
Pa e dianan aki y pa e añanan cu ta bin nan tema ta Educacion Sostenibel.
“Dus, nos ta bay bek na e pakico eigenlijk nos ta haci e trabao aki, cu nos no ta duna e mucha djis, les pa e siguiente klas, pero cu nos ta duna e mucha les pa futuro. Pa den futuro e ta un miho ciudadano pa Aruba, y pa mundo”, Ruzischka Tromp a expresa.
SKOA semper ta kere den nos expertonan local y nan a ofrece diferente tayer di trabao presenta pa expertonan local, pero tambe pa haci e evento mas interesante pa variedad, nan a invita expertonan internacional tambe.
“Pa full e personal di SKOA e dia aki tabata obligatorio, e alumnonan a keda cas, pero nos docentenan t’akinan.
Esaki ta parti di nos programa di profesionalizacion di nos docentenan. Y ora nan t’akinan nos tin diferente topico: musica, arte, social- emocional, digitalizacion. Anto nan mes ta pidi e area unda nan tin cu crece mas y kier crece mas, anto e nan ta scoge e sesion ey. Nos tabata tin tambe un tema cu ta di IA (Inteligencia Artificial), pero mi tin cu bisa cu SKOA a inverti e ultimo diez añanan, hopi den digitalizacion. Y nos ta wak tambe cu digitalizacion no ta tur cos tampoco, anto e ora ey purba busca e balansa entre digitalizacion y e otro materianan cu ta bin dilanti”, MSc Ruzischka Tromp a duna di conoce.
