Departamento di Asunto Social:
ORANJESTAD (AAN): Departamento di Asunto Social (DAS) ta brinda guia y sosten pa persona of famia cu pa un of otro motibo ta experiencia un momento dificil den nan bida. Entre otro, nos ta brinda servicio di guia social, sosten financiero, abogado liber y sosten psicosocial y emocional den e seccion di bida y famia.
Aña pasa, tabata un aña yena cu cambio pa e organisacion, entre otro ‘rebranding’ y cambio di localidad. Actualmente, DAS tin tres localidad, esta na Caya Mario E. Harms 11, Savaneta 6 y MFA Noord. DAS a crea accesibilidad y oportunidad pa cada cliente tin un localidad cerca di nan districto.
DAS tabata kier a remarca cu e edificio na San Nicolas conoci como “hospital bieu” unda a brinda pa añanan servicio na clientenan, no lo keda bandona. E edificio aki ta den e prome fase di e proceso pa renobacion. E ta un proceso cu lo tuma tempo, pero cu lo tin su fruto pa futuro. Mientras tanto, DAS ta sigui traha cu e vision di crea bienestar pa nos tur.
