E momento a yega pa atende puntonan importante den Parlamento
- Democracia a haci Parlamento e centro di gobernacion di e pais
- Tur organisacion mester di dirigente pa e por funciona
ORANJESTAD (AAN) Den e sistema politico di Aruba tin un parti cu ta basa riba loke publico ta mira y kier mira y tin un parti cu ta basa riba e intencion di ley cu ta base pa bon funcionamento di comunidad y cu demasiado bez ta desconoci pa publico.
Ta hustamente e falta di conocemento real di e funcionamento di Parlamento ta haci cu interpretacionnan robez ta wordo duna na un situacion.
Na hopi occasion DIARIO a relata con abuso ta wordo haci di representacion di Pueblo dor di Miembronan di Parlamento, cu e sistema electoral di Aruba ta entrega posibilidad pa subi e trapi social y haci y deshaci loke na un compania cu ta paga nan un salario, nan no por haci.
Den pasado trabou na Parlamento tabata honor y no tabata tin salario conecta na sirbishi di Pueblo te na e momento cu a dicidi cu ta haci e trabou den Parlamento un asunto full time cu creacion di salario importante pa Miembronan di Parlamento, cu asina haya un responsabiolidad mas grandi pa loke nan ta presta.
E prestacion aki ta laga hopi di desea y na varios ocasion, DIARIO a expresa su preocupacion serio pa e nivel di Parlamento, cu no ta cuadra cu e posicion cu Democracia a entrega miembronan di Parlamento pa representa Pueblo.
E problema aki no solamente ta presenta su mes na Aruba, pero rond mundo caminda politica a habri un mundo nobo pa personanan cu ta uni na partidonan politico y ta uza e arma di democracia, pa nan crea poder propio.
Na hopi ocasion DIARIO a urgi pa restablece regla estricto pa Parlamento y pa mantene orden den Parlamento, cu ta wordo dirigi dor di un Presidente cu Parlamento ta apunta y cu como tal merece respet.
Den persona di mr. Vrolijk,m Aruba a haya un Presidene di Parlamento cu ta exigi pa tene na regla y ta percura actualmente pa revisa e sistema di funcionamento di Parlamento, cu sigur den e epoca moderno, no ta soporta cierto situacionnan mas.
Mester bisa cu e nivel di Parlamento a subi compara cu momentonan cu mester a cuestiona loke ta pasa den sala di Parlamento, cu ta centro di democracia y e resultado directo di eleccion liber, cu ta base pa gobernacion di Aruba.
Por tin momento cu Edgard Vrolijk a faya pero DIARIO, cu ta referi na tanto publicacion riba actuacion den Parlamento, mester a duna Vrolijk razon ya cu el a acepta e encargo pa dirigi e nucleo democratico di Aruba, cu a wordo introduci pa sirbi bienestar di Pueblo y no como teatro politico di e pais.
Awe Gobierno a cay pasobra e maneho di Vrolijk a wordo rechasa. Manera ya a wordo bisa, por tin momento cu e por a expresa su mes na un forma cu por ta un fayo cu ta humano y ta aplicabel pa tur hende.
Ban spera cu e incidente habri caminda pa mas respet pa representacion di Pueblo dor di politiconan, cu mester bati man riba nan pecho pa e forma cu nan ta atende cu e representacion di Pueblo, pa cual nan ta wordo paga como trahador full time! E presidente mester sigura cu e placa di Pueblo ta wordo uza pa trabou na nivel di Pueblo di Aruba!
