ORANJESTAD (AAN): Directora di Biblioteca Nacional Aruba, senoña Astrid Britten, a ricibi 10 ehemplar di e buki nobo titula
‘Willem Rasmijn: storia di su bida y di e keintura di oro Arubano’ for di autor Edgar L. Ras.
Edgar Ras a presenta un buki cu el a skirbi como homenahe na pasado di Aruba, unda historia y ficcion ta topa cu otro. Den e tera seco di Aruba, un hoben yama Willem Rasmijn a topa cu algo cu a cambia historia di Aruba pa semper. Pero e balor di su descubrimento no tabata solamente den oro, sino den e memoria di un pueblo, den e silencio di e mondi y den e pasonan di generacionnan cu a keda atras. E buki aki ta un homenahe na Willem Rasmijn pa duna bida y bos na un nomber cu nos no mester lubida. Cu respet, emocion y identidad, e buki aki ta hiba e lesado den un relato tocante descubrimento, lucha, dignidad y herencia.
Edgar Ras a labora activamente pa 42 aña den Cuerpo Policial Aruba. Na Scol pa Polis ela ocupa e funcion di docente/instructor. Tambe el a funciona como desaroyado di material, tanto pa enseñansa policial, como pa instancianan gubernamental y ultimamente pa sector priva. Su funcion principal, desde 2015, tabata Coordinador di Curso y Entrenamento y durante su ultimo 2 añanan di servicio activo, e tabata hefe suplente. E buki lo ta den circulacion di biblioteca pronto pa un y tur por lesa y consulta.
