Uno di e retonan cu mester haya mas atencion urgente
- Enseñansa pa adulto y acomodacion di mas trahador importante
- Participacion mas largo na sector laboral ta baha gasto nacional
ORANJESTAD (AAN)- Cifranan di 2021 tocante edad di trahadornan, ta papia un idioma comprendibel.
E cantidad di persona den e grupo di edad di 20 pa 24 aña di edad, cu ta participa na sector laboral ta casi igual na e cantidad di personanan ariba 65 aña di edad.
Edad pro medio ta subi na mundo, cu ta conoce gasto pa entre otro cuido medico cu e proceso aki ta trece cune.
Na mes momento, control di crecemento familiar, ta trece cune e preferencia pa menos yiu.
E proceso di edad mas halto ta resulta den un responsabilidad mas halto pa gastonan pa cuido di personanan di mas edad, pero ta wordo recompensa tambe parcialmente pa e participacion di personanan na edad mas halto na e proceso laboral, cu no ta keda sin produci su retonan.
Informacionnan internacional cu a alcansa DIARIO, ta indica un aumento den e edad di personanan cu ta asisti na e proceso educacional.
Un estadio realisa na Merca, a demostra cu 41 porciento di studiantenan cu a haci uzo di e sistema escolar na college cu ta cobra pa educacion cu nan ta duna, na 2017 tabata riba 35 aña di edad. 33 porciento di estudiantenan na school priva cu no tabata traha cu ganashi, tabata tin mas cu 35 aña di edad.
Pa nan sigur bida ta cuminsa na edad di 40 aña, cu tabata antes e edad cu tabata habri porta pa hende ya cuminsa papia di e edad cu nan lo a pone un fin na trabou, pues lo a retira.
Sinembargo, tin un reto nobo.
Bida mas largo y hasta medionan pa mantene un bon salud na un edad mas halto, ta baha gastonan di cuido medico y ta subi e posibilidad pa sigui participa na produccion di trabou, loke a permiti sistemanan di pensioen pa aumenta nan edadnan na forma continuo.
Ta surgi e problema di evolucion den e mercado laboral cu mas y mas ta adapta su mes na sistemanan moderno, den cual Inligencia Artificial ta hunga un papel importante.
Esaki ta nifica cu mas y mas trahador mester sigui e proceso continuo di educacion avansa pa adapta nan mes na e sistemanan moderno, cu ta wordo haci posibel dor di Inteligencia Artificial.
Pues e caida di gastonan cu comunidad tin cu aumento di edad, ta enfrenta necesidad pa habri porta pa personanan di edad mas avansa cu mester sigui e proceso educacional aunke nan edad ta subi, haya oportunidad pa sigui atende cu e sistema escolar.
Manera DIARIO cu insistencia a presenta, preparacion pa haya empleo ta bira cada rato mas importante cu exigencianan nobo pa personanan cu kier drenta e proceso.
Pero tin necesidad urgente pa atende e forma cu adultonan di edad tambe cada rato mas halto, por participa na e proceso educutivo pa evita cu nan ta bira un peso innecesario pa comunidad.
Na Merca y Europa sigur e desaroyo ta haya tur atencion ya cu tin mas atencion pa e realidad cu avanse di Inteligencia Artificial ta deshaci di Miyones y Miyones di cupo di trabou pero ta crea cupo nobo di trabou, cu ta nifica cu e sumanan cu ta hinca den e sistemanan educacional di e pais, mester wordo uza tambe pa personanan cu ya no ta mucha ni hoben pero ta participa na e proceso laboral.
DIARIO ta den contacto cu informantenan cu ta presenta diferente forma con por atende cu e mercado laboral na un forma cu e ta deshaci di e peso importante cu e ta na e nacion na diferente manera y ta permiti personanan di edad mas halto sigui forma parti di e proceso laboral.
Adaptacion di horarionan di trabou ta parti di e sugerencianan cu a bini dilanti den e pakete nobo di reto cu ta enfrenta comunidad mundial.
