Minister Wever ta bay Suriname pa papia riba un
ORANJESTAD(AAN): Diamars durante un conferencia di prensa minister di Asuntonan Economico Comunicacion y Desaroyo Sostenible Geoffrey Wever a duna di conoce cu e ta bay haci un viahe di trabao pa Suriname awe, pa atende un conferencia di ECLAC di Nacionnan Uni, pa Caribe y Latino America.
“Eynan ta bay tin dos dia di reunion riba agenda poni, caminda cu ta bay discuti riba establecimento di un asina yama ‘Economic Resilience Fund’ cu ta un fondo pa paisnan den Caribe y Latino America pa absorba asina yama ‘shocks externo’ manera locual a sosode rond di COVID-19”.
E topiconan riba agenda ta mas tanto pa wak con Caribe y Latino America por bira mas resiliente, con nan por defende nan mes mas mihor y con nan por prepara pa shocks externo, segun e mandatario.
Wever a sigui bisa cu mayoria di e paisnan den e region tin e mesun complicacionnan manera nos na Aruba, importando asina hopi producto y wordo confronta cu desaroyonan internacional sin cu por controla esey.
“Pesey ta bay papia riba introduccion di un Caribbean Economic Resilience Fund, cu ta un topico hopi interesante”, segun e minister.
El a sigui bisa cu e fondo aki sigur lo pro yuda, mirando cu ora cu e pandemia a dal Aruba y mundo henter, nos isla no tabata tin un sistema pa absorba e tipo di efectonan externo aki.
Segun Wever, 30 aña pasa Aruba no a cuminza cu un programa di spaar, pa ora cu algo asina sosode nos ta bon prepara.
“Locual nos mester preveni ta ripiti e mesun tipo di errornan ey pesey ta necesario pa nos sigui papia riba e maneranan con nos por preveni cu den futuro nos pais ta pasa den momentonan dificil”, segun e mandatario.
El a splica cu un otro topico riba cual lo papia ta bay ta ‘Achieving the SDG’s in the Caribbean’.
“Como minister di Desaroyo Sostenible mi ta responsabel pa implementacion y promove e Sustainable Development Goals na Aruba y e agenda aki ta duna contenido na esey”, segun Wever.
