Prijs di azeta ta sigui cay bou 60 Dollar pa baril na un mundo caotico
*Aruba mester actua y prepara pa revolucion mundial y horcan
*Alarma mundial grandi mientras un dede riba boton ta guera
ORANJESTAD (AAN) — “Gobierno mester actua awor,. Hunto cu Hulanda cu ta responsabel pa defensa di e pais y bienestar di e Arubianonan den un Guera, mester confronta Pueblo di Aruba den un situacion mundial cada rato mas caotico.”
Esaki ta informacion cu DIARIO a ricibi ayera di informantenan sumamente preocupa cu e rumbo cu mundo a drenta den e ultimo dianan y cu a culmina ayera.
Alarma mundial grandi a bati ayera ora Israel a anuncia un guera sin frontera di ningun clase na e area di Gaza, despues cu na Ukraine e acuerdo cu Merca a restablece e relacion entre e dos paisnan a base di e acuerdo di mineralnan.
“Mundo ta hopi leu for di paz y ta riba tur tereno tension ta crece,”informantenan clave a splica DIARIO.
Atencion sigur a wordo concentra ayera riba e situacion na Medio Oriente caminda Gobierno di Israel a amenaza cu exterminacion di tur cu ta biba riba e teritorio di Gaza.
Informantenan di DIARIO a mustra ayera cu Aruba mester wordo bon prepara pa e situacion mundial, cu ta marca awor pa e realidad, cu un dede solamente mester pa primi e boton pa un guera mundial rementa.
Situacion serio ya ta afecta cantidad di pais na mundo y asina tambe den vecindario directo di Aruba na paisnan cu ta biba di ingreso di petroleo.
Guyana a wordo presenta como ehempel di un pais cu ta wordo seriamente afecta pa e caida di prijsnan di petroleo, cu ta afecta su economia directamente.
Manera a bini dilanti esaki ta solamente uno di e paisnan cu ta depende economicamente di e ingreso di petroleo, cu ayera a bolbe conoce caida di prijs den un situacion mundial alarmante.
E grito pa Aruba cuminsa atende cu mas seriedad e situacion mundial cu ta rementa, a bolbe resona ayera. Manera informantenan ta trece dilanti, na e momentonan aki Pueblo di Aruba mester wordo prepara pa dos asunto importante cu ta e inicio di temporada di horcan den cual naturaleza ta amenaza pa bienestar di e teritorio di cual Aruba tambe ta forma parti na momento cu e situacion mundial ta expone Aruba na un skituacion di emergencia.
Manera ya DIARIO a trece dilanti, Pueblo di Aruba ya mester a wordo informa di un plan total pa atende cu e situacion mundial cu a urgi y cu DIARIO na un forma total a presenta na Pueblo di Aruba for di momento cu problemanan a cuminsa saca cara na horizonte como resultado di e gueranan di petroleo cu a hinca mundo den suspenso economico for di añanan 70.
Informantenan a indica cu no tin tempo mas pa perde pero cu awor Pueblo di Aruba mester wordo notifica di tur medida cu mester tuma na e momentonan aki pa confronta temporada di horcan pero tambe situacionnan mundial cu por surgi.\
Pa cuminsa mester percura pa tin suficiente alimento. Esaki ta exigi pa na nivel nacional cuminsa tuma medidanan pa tin suficiente cuminda pa Pueblo den un situacion di emergencia total.
Manera a bini dilanti na 2025 no ta solamente asunto kico por pasa den un desastre local, pero kico por pasa si den un situacion di teror mundial, un situacion serio presenta.
Aruba mester crea pa cuminsa mas reserva nacional di placa, teniendo cuenta cu Aruba ta depende di turismo cu ta bira e prome victima di peligro mundial.
E Mericano ta directamente conoci cu e peligronan di seguridad grandi na mundo cu riba diferente tereno a nace na Merca mes tambe manera e situacion di tarifa cu ta pone un stress enorme den comercio mundial.
Reino Hulandes ta biba cu e realidad di armamento cu ta costa placa pero tambe cu e necesidad pa atende cu resultadonan di e actual situacion cu por presenta, mientras problemanan social ta aumenta na e pais.
Informantenan clave ta di opinion, cu na e momentonan aki Gobierno y gremionan mester prepara Aruba pa un situacion sumamente serio na un mundo cu a conoce e peligro enorme di atakenan riba e sistemanan cu ta dirigi por ehempel sistemanan di electricidad, comunicacion y industrial y por paraliza economia di un pais di biaha.
Na entrada di Mei 2025, un situacion mundial serio ta exigi un gobernacion cu ta atende cu Aruba como parti di un mundo cu problemanan explosivo.
