Kico e fayo di Putin ta nifica pa e region di Caribe y Latino America? --- *Putin a logra unifica Europa y habri un epoco nobo pa NATO --- *Putin a presenta mundo na un heroe cu ta Zelensky Presidente Ukraine
ORANJESTAD (AAN) — Kico realmente ta bay pasa? Esaki ta e pregunta ayera, na momento cu mundo tabata conoce un confusion enorme.
Informantenan cu kende nos tabata tin contacto na varios pais, ta papia di un tension mundial cu ta basa riba incertidumbre grandi entorno desaroyonan cu por wordo spera na nivel internacional.
Dia 24 di Februari ora Putin a dicidi cu e ta invada Ukraine, mundo a wordo hinca den un estado di panico, cu ainda no a termina.
Uno di e motibonan mas importante cu mundo tabata na careda, sin duda, tabata e hecho cu Putin tabata menasa cu e bom atomico y a haci cu e tabata prepara pa tur cos, si e no logra e conkista di Ukraine.
Ora nos atende cu e situacion cu a presenta su mes na Ukraine, tin cierto asuntonan serio cu ainda nos no por mira yega na un final.
Kico Putin ainda por haci? Kico paisnan cu a perde den nan posicion na fabor di Putin, ainda por haci?
Mundo di petroleo ta duna un indicacion grandi di loke ta spera na momento cu mundo mester a cuminsa prepara pa bira loba pa petroleo cu riba su mes tin implicacion diferente pa cada pais.
Tin diferente pais desaroya, cu a prepara nan mes pa cambio di clima y negoshi cu nan por haci cu tecnologianan.
Di otro banda Rusia, pais mundialmente number uno di petroleo, y diferente di su sostenedornan, kier sigui haci uzo di e entrada di petroleo.
Con petroleo ta bira un factor mas importante cu su are economico so, ta bini dilanti na Venezuela, caminda ayera a cera cu e informacion cu Chevron lo a haya permiso di Merca pa sigui cu su negoshinan na Venezuela.
Chevron ta directamente mara na PDVSA cu ta su partner.
Otro situacion controversial a culmina dilanti costa di Aruba, na momento cu di un banda Gobierno Joe Biden ta yega na un areglo aparentemente cu Nicolas Maduro, cu segun otro informacionnan a mustra cu e ta sigui sostene Rusia, loke ta mas cu claro ya cu e debenan cu Venezuela tin cu Rusia, ta enorme.
Kico e logro ta pa Putin, cu a introduci mundo na un heroe yama Zelensky cu a demostra cu su pais no ta entrega su mes na Vladimir Putin?
Putin no a logra mucho pa su mes ni pa Rusia for di momento di invasion.
Loke por yama un logro di Putin sin duda ta hustamente loke e kier a kibra, tabata e forsa di Union Europeo cu for di momento cu Inglatera a dicidi pa Brexit, a conoce menasa di mas pais, cu nan tambe ta bay.
Awe mas pais a bira miembro di Union Europeo y ta parti di NATO, cu mester drenta un futuro nobo a base di diferente punto cu a bini dilanti.
DIARIO lo bay amplia riba e puntonan legal y tecnico cu mester bay atende na un mundo den un tension enorme.
Paso pa paso DIARIO lo conduci su lectornan den e situacion mundial cu lo produci un recesion cu manera ayera informantenan internacional a indica por alcansa proporcionnan serio.
