Mientras prijs di petroleo forzosamente a baha pero por bolbe subi
*Placa di e Arubiano mester keda den circulacion na Aruba
ORANJESTAD(AAN)—Hasta prijs di petroleo cu ta subi manera un fli pa alcansa 100 Dollar pa baril, mester a dicidi pa un cambio.
Historia a wordo marca pa e hecho cu hasta e gueranan na Ukraine pa no papia mes di Medio Oriente, no a mira un aumento enorme di prijs di petroleo, cu a baha bou di 90 Dollar pa baril!
E caida di demanda na un mundo caminda e consumidor a cuminsa defende su sobrevivencia y mester corta den su gastonan, a haci cu petroleo tambe mester a adapta su mes.
E resultado ta cu prijsnan generalmente lo mester baha, dependiente sinembargo, di e momento cu a cumpra mercancia cu a drenta den circulacion.
Placa pa gasta ta e problema mas grandi cu rond mundo hende ta enfrenta y cu tin politiconan na tur parti di mundo na careda of si nan ta den oposicion haci uzo di e oportunidad pa splica cu prijsnan a subi.
Incertidumbre enorme ta loke ta reina rond mundo, caminda guera ta produci horor y ta deshaci di calculacionnan cu a wordo haci.
DIARIO a atende e situacion cu ta presenta su mes actualmente cu su informantenan cu a indica, cu na e momentonan aki e aumento di produccion di economia di sombra, ta loke ta bira uno di e factornan importante atrobe na Aruba.
Economia di sombra ta basa riba actividadnan comercial inoficial cu ta permiti e Florin sigui lora y asina no solamente debenan pa goza di e temporada di fiesta wordo paga, pero tambe debenan anual cu mester wordo cubri cu entrada extra di fin di aña cu durante e ultimo añanan a sufri hopi despues cu Covid-19 a deshaci di tur loke tabata normalidad na mundo.
Manera informantenan ta trece dilanti, e hecho cu Florin ta lora fin di aña, ta solucion pa hopi problema financiero actualmente.
Pa Aruba e temporada di turismo y e placa extra cu turistanan tambe ta gasta den temporada di dianan di fiesta ta trece alivio na forma directo pa e pais cu por cobra mas placa di belasting debi na mas entrada, pero tambe pa e forma cu tin mas espacio pa gastonan extra.
Informantenan ta mustra riba e diferente actividadnan comercial inoficial, cu ta forma e economia di sombra y ta basa riba produccion di por ehempel hayaca y tur loke ta tradicion di dianan di fiesta.
Cuminda y bebida ta keda un factor basico den economia ya cu nan ta basico den celebracionnan di fin di aña.
“Mundo ta pasa den un situacion sumamente serio. Hende tambe ta confronta un punto di cansancio cu ta exigi hende bandona preocupacion pa dificil cu esaki ta,”expertonan ta trece dilanti.
A wordo mustra cu e situacion actual ta diferente na e problemanan cu mundo a confronta den e atake di Covid-19 pasobra actualmente ta cantidad di problema cu ta depende di cantidad di situacion mundial ta presente.
Den e caso di Covid-19, despues di e prome shock y sigur e uzo di vacuna, por a programa mas of menos e momentonan cu e impacto lo a baha.
Den e situacion mundial, pronostico ta bira casi imposibel pasobra e situacion ta caotico loke ta nifica cu responsabilidad ta exigi lidernan den tur sector, pa practica cautela y percura pa reserva y maneho sano.
Salida di 2023 ta topa cu un mundo, pues un Aruba tambe, den un incertidumbre enorme pero tambe cu un peso grandi manera cambio di hasta naturalesa, di clima, ta representa.
Ta den e ambiente aki, e economia di sombra, ta bolbe resalta sigur na Aruba caminda mantencion di tradicion ta percura pa placa keda den circulacion pa na momento cu saluda 2024, hasta cay den e sombre di dande, cu imediatemente despues ta wordo sigui pa otro evento productivo pa economia, cu ta Carnaval.
“E Florin ta lora cu ingenuidad den e proximo lunanan y e circulacion aki ta sostene e economia local,”informantenan ta indica.
Por bisa pues cu temporada di dianan di fiesta ta forma un oportunidad no solamente pa hende lubida problema, pero atende cu problema y keda agradecido pa loke ta posibel na Aruba, den un mundo di dolor humano y problema financiero.
“E tension actual na Hulanda, caminda eleccion ta wordo dicidi practicamente riba e habilidad di politiconan Hulandes pa e Pueblo por sigui come y tin un dak riba su cabez, mester splica Aruba e realidad di e ultimo parti di 2023, den cual tradicionnan di Aruba ta entrega e Arubiano e posibilidad pa Florin sigui lora,”a bini dilanti!
Awor Aruba mester sostene su comercio grandi y chikito, den centro comercial of cushina den e cas den bario, pa e Florin sigui lora y no termina den carteranan den exterior, informantenan a conclui.
