ORANJESTAD (AAN) – Prome Minister Evelyn Wever-Croes, a informa den conferencia di prensa di gobierno Diahuebs,
cu despues di e vacunathon-2 gobierno ta bay cambia su maneho, encuanto Covid-19.
“Nos ta bay cuminza ‘schaal af’. E localidadnan cu nos tin aworaki ta localidadnan masal, grandi. Cu vacunathon nos no por sigui mantene nan mas, y poco, poco nos ta bay den e situacion di normalidad na unda ta na DVG, bo ta haya e vacuna riba afspraak”, Minister Presidente a duna di conoce.
SERVICIO UNIDAD MOBIL:
Pareu cu esey, e dignatario a agrega, nan lo ta mas den barionan cu unidad mobil pa haya esnan cu ta interesa pa haya e vacuna. “Tambe cu un trailer medico, cu lo bay den e barionan, mas cerca di e ciudadano pa dune servicio, den e caso aki e vacunacion”, e dignatario a informa.
Minister Presidente a menciona cu ya caba e unidad mobil, riba invitacion di doñonan di trabao ta acudi na empresanan, e personal ta duna informacion na e trahadornan y na mesun momento ta ofrece facilidad pa vacunacion.
“Esaki ta un facilidad pa tur empresa pero tambe na cas pa tur esnan cu no por move facilmente. Nan ta yega cerca bo pa duna bo e vacuna.
SERVICIO TRAILER MEDICO:
E trailer medico lo bay den barionan, parokia, supermercadonan, pa asina esnan cu ta haciendo nan diligencia, nan respondinan, tambe por haya e oportunidad aki di vacuna”, Minister Presidente a menciona.
SOLIDARIDAD NACIONAL:
Minister Presidente, pa loke ta e vacunathon #2 di e fin di siman aki, kier a haci un yamada riba solidaridad nacional.
“Mas di siete mil ciudadano a acudi na e prome vacunathon, a ricibi e prome vacuna, y nos ta conta cu e fin di siman aki tambe nan ta bay acudi pa e di dos vacuna.
Pero, nos kier bay un stap mas leu. Nos kier inspira y pidi cada un cu ta bay tuma su vacuna e fin di siman aki, pa convence un amigo, un familiar, un colega pa bay cu bo y tuma su vacuna. Si ta e prome of e di dos, bay cune pa e vacuna pa asina nos tin mas hende cu por vacuna” Wever-Croes a reitera.
E mandatario a subraya cu e vacuna tin su beneficionan y alavez, gobierno por flexibiliza su medidanan un poco mas.
“Nos a demostra caba cu ora nos para hunto den retonan di nos pais nos ta surpasa nan. Aworaki e reto ta pa nos yega na un grado di vacunacion mas halto y pesey nos ta pidi pa nos hacie hunto, pa convence esnan cu tin preocupacion, pa nan tambe logra vacuna”, Minister Presidente a bisa.
