Den un epoca nobo di economia mundial un berdad historico ta resona
*Celebracion di San Juan y e balansa necesario pa progreso total di un pais
*Fiesta di San Juan ta entrega e prueba di e caracter unico di Aruba den region
ORANJESTAD (AAN) — Un comunidad conoce varios aspecto di importancia cu mester topa den e bienestar di e pais.
Pa defini kico ta na interes di un pais, na prome lugar mester defini un pais, cu ta resultado directo di historia di humanidad cu atrabez di tempo a conoce cambionan grandi pero tambe mester lucha pa mantene su identidad.
Den e lucha Arubano pa sobrerania den Reino, e balor di identidad propio di Aruba a hunga un papel grandi cu ta resalta y ta duna e pais un toke unico.
Fiesta di San Juan no solamente na Aruba pero na hopi pais cu a conoce cambionan historico cu a exigi adaptacion di e cultura original, por topa cu un cultura propio cu ta wordo domina pa e cultura importa.
Fiesta di San Juan ta un fiesta cu ta hiba e pais na e tempo di conkista, cu a cambia e comunidad original di e pais.
San Juan ta pertenece na e religion Catolico Cristian, cu a alcansa e continente nobo America durante e temporada di conquista. Ora observa e forma cu San Juan ta wordo celebra, ta mira claramente cu e fiesta di San Juan na Aruba, ta diferente for di e fiesta na mayoria di pais.
E magia di candela tin un expresion diferente na Aruba y mayoria di otro paisnan na continente Americano.
Na Aruba e parti di bula candela y otro actonan comun na diferente pais, no ta bini dilanti. Aruba ta dera e gay cu a canta ora San Pedro a nenga Jesus. Despues cu un palo den man, ta castiga e animal den camponan cu a wordo prepara pa entrega cosecha den e tempo di yobida.
Aruba no ta bula candela, cu ta un practica popular na varios lugar cu ta celebra San Juan na e continente Americano.
Esaki ta haci cu e celebracion na Aruba tin un toque special, den cual e candela ta cende pa hacie tereno limpi, caminda e cay cu mester wordo castiga ta dera.
Di e forma aki e celebracion di Aruba ta diferente na mayoria otro celebracion cu tambe tin ritmonan y bailenan cu ta mas basa ariba e tambu di Africa y no e musica autentico di Aruba.
Aruba tin como entrada principal, e sector economico di turismo cu ta basa ariba e necesidad di hende pa biaha y entre otro cera conoci cu tradicionnan y costumbernan di otro pais.
E hecho cu turismo ta produci placa pa un pais na hopi occasion a haci cu cultura di pais ta wordo cambia.
Mientras esaki ta afecta directamente e cultura di un pais na mes momento e por bira un acto di suicidio pa turismo tambe cu ta wordo busca pa autenticidad di un pais.
Ta sumamente importante pa lucha pa salvaguardia e caracter Arubano di Dia di San Juan y e herencia cultural di Dera Gay pa evita tambe uno di e motibonan cu adaptacion di caracter nacional na turismo pues, ta bira un acto di suicidio di turismo cu ta perde su autenticidad.
E celebracion di San Juan di Aruba ta uno cu ta hopi atractivo pasobra e ta crea emocion den e ansia pa descubri y “mata” e gay, pero a wordo adapta den transcurso di tempo na e valor mas importante di no herida animal, pero si mantene intacto e rito alegre, cu ta uni hende na un forma special.
San Juan na Aruba ta algo unico y mester preserva e fiesta como un presentacion cultural di e pais na e forma cu den historia el a keda preserva.
Mester evita cu turismo ta causa e impacto cu e tin na tanto destinacion turistico, cu ta adapta nan valornan cultural na e industria di turismo.
E turista y e Arubianonan mester topa den e ambiente ameno di e tradicion di dera gay, cu ta crea emocion cu imitacion den show no por entrega.
Mundialmente e sector economico di turismo ta den un epoca di cambio pero interesante ta, cu na hopi pais hustamente ta trata na regresa na e parti di autenticidad di un pueblo, na su cultura y na su historia.
Preservacion di autenticidad di San Juan awe mester ta un exigencia pa asina Aruba por sigui entrega su historia y cultura na un mundo, den cual Aruba ta entrega mundo hustamente ariba diferente tereno, aspectonan cultural cu ta diferente na loke ta e cultura di mayoria di e region di Aruba pa un motibo masha simpel.
For di momento cu el a wordo descubri, Aruba tin un historia diferente na otro paisnan den su region. Aruba su pasado ta diferente. Su musica, su caracter y alma ta diferente y esaki ta haci Aruba unico den su region enfrente un mundo curioso pa conoce e Arubiano, representante di tur e etapanan cu historia ta entrega un pais.
Ta e etapanan aki di historia a entrega Aruba su realidad, cu a bira su fuente economico mas principal, cu hamas mester cambia pasobra ta e caracter unico di Aruba y e Arubiano, ta e yabi di exito di economia di e pais.
Turismo a bira e fuente economico mundial, cu a entrega un prueba. Tur pais cu a bandona nan rikeza cultural y natural, a comete auto destruccion pasobra nan a entrega e fuente unico di nan economia.
Ta hustamente turismo tambe ta exigi pa Aruba mantene su propio naturaleza unico den su cultura, su imagen, su esfuerzonan pa lucha pa su pan di cada dia cu ta economia!
