Mientras Rusia a scoge pa e invasion diferente di Ukraine --- *Negoshi den petroleo ta intensifica pa 2025 a pesar di clima --- *Panorama interesante ta desaroya pa Zuid di region Caribense
ORANJESTAD (AAN) — Segun e Acuerdo di Clima cu a wordo alcansa na 2020, paisnan ta tene nan mes na reduccion serio di uzo di carbon, petroleo y gas pa asina reduci e problemanan cu cambio di clima lo trece pa mundo.
Ayera a cera cu desaroyonan cu DIARIO tabata sigui di acerca debi na e resultadonan directo cu nan lo tin pa mundo.
E conflicto di Ukraine lo nifica cu lo tuma sancionnan contra Rusia cu ta uno di e productornan grandi di petroleo y di importancia serio pa companianan na Merca, cu ta produci articulonan cu base petroleo manera ya DIARIO a splica na otro ocasion.
Tambe Rusia ta entrega na Europa por ehempel.
Kico lo pasa ora sancionnan cera porta pa entrega di gas y petroleo dor di Rusia? Uno di e preguntanan grandi na final di dia ayera mientras otro desaroyo tabata tuma lugar pa Zuid di region di Caribe.
Informacionnan cu a drenta tabata mustra riba interes di e Presidente di Brazil pa yega na cooperacion cu Guyana y Surinam pa asina aumenta e produccion petrolero di e paisnan dor di cooperacion comun.
Esaki ta nifica cu e region ta bay conoce un gigante den produccion di azeta cu na e momentonan aki ta priminti di bira un mina di oro pa Surinam, cu ta sigui descubri mas y mas petroleo dilanti su costa.
Segun e Presidente di Brazil, por yega na un union entre e tres paisnan cu tin un pais hopi interesante den nan vecindario directo, cu ta Venezuela di Nicolas Maduro cu ta habri porta pa inversionistanan di paisnan cu ta wordo rechasa dor di paisnan democratico.
Kico por spera di e desaroyonan pa Zuid di Region di Caribe, cu conoce un Trinidad, cu tin petroleo como base economico tambe?
Tin cierto puntonan importante. Brazil y Venezuela ta e dos paisnan grandi cu abiertamente a duna prueba cu nan ta sostene Putin.
E dirigente di Brazil a bay Rusia pa duna Putin un man, na momento cu situacion na rementa na mundo.
Otro punto importante ta, cu ta wordo papia di plannan cu mester culmina na 2025, mientras na 2020 mundo a bay di acuerdo cu ta reduci negoshi di petroleo mundialmente y cu no ta inverti placa mas den negoshi di petroleo.
Kico ta pasa pa Zuid di Region di Caribe cu negoshi di petroleo, cu mundo a scrap pa futuro?
Un negoshi internacional cu ta wordo menciona pues tambe den e conflicto na Ukraine cu for di ayera a wordo invadi na un forma diferente dor di Putin, cu a acepta dos estado “independiente” di Ukraine como pais liber y asina na su forma ya a duna inicio na invasion di Ukraine.
Mundo liber a cuminsa contesta cu medidanan, cu lo afecta e negoshi di petroleo y gas mundialmente.
DIARIO tin su bista dirigi riba un mundo na guera den cual comercio mundial, manera nos a anuncia for di e prome momento, ta hunga un papel importante.
Pa Zuid di Aruba desaroyonan importante ta tuma na lugar entre paisnan afilia na Rusia (Brazil y Venezuela) cu un Surinam cu for di su independencia ta marca pa instabilidad politico y menasa di gobiernonan peligroso.
DIARIO lo sigui informa Aruba riba tur desaroyo.
