ORANJESTAD (AAN) – Na Aruba nos ta conoce como Trupial, pero na Panama, Suramerica y Centroamerica y otro areanan di Caribe, su nomber ta “Turpial”.
E Trupial di Aruba, e temponan aki nos por mire unda cu tin palo fruta, por ehemplo riba e mata di cactus awor cu ta su temporada di fruta. E Trupial ta emiti un canto precioso, cu posiblemente, ta su manera di comunica cu su pareha of su grupo, ora cu nan bula mainta den busca di alimento.
Por ripara cu ora e cuminza canta riba un palo di fruta, hopi lihe mas Trupial ta bin acerca, pesey kizas por bisa cu su canto ta pa informa e otronan, cu unda e ta tin cuminda.
Cu su nomber di “Turpial” el a wordo decreta como e Pahra Nacional di Venezuela. Pero su origen ta Latinoamericano, posiblemente for di Panama el a imigra na resto di e paisnan y Caribe, y asina a yega na e Islanan di Caribe Hulandes.
E ta un pahra masha chikito cu su cabes y halanan color preto di e curpa entre geel y orange, y su pico tin forma di cone. E ta establece su habitat den lugarnan cayente, y por biba su so of den pareha.
Su canto ta varia y cu hopi melodia. Na Aruba e ta wordo considera un di e pahranan di mas bunita, y manera nos tur sa, un di e miho gruponan di cantante cu a lanta na Aruba hopi aña pasa, y cu tin miembronan adulto y hoben, ta yama “De Trupialen”.
E ta sali canta ora ta amanece y e ta trece hopi alegria den e hogarnan ora e famianan ta lanta y bay pafo, pa wak y scucha nan. E ta come insecto di manera cu ta yuda e ecosistema, pero su cuminda preferi ta fruta.
