ORANJESTAD (AAN) – Ta parce cu na Aruba, definitivamente no tin mas control riba supermercadonan,
y ta hopi biaha cu un of otro consumidor ta haya productonan venci, caduca, pasa di fecha, con cu kier yame.
No tur consumidor ta revisa fecha di expiracion di productonan manera juice, yellow, pudin, cu ta den reki, pero si ta core cumpra si nan ta mira cu e prijs ta mas abao cu normal.
Esey a pasa cu un cliente cu a bay un supermercado na Santa Cruz pa cumpra gelatina (yama den pueblo como ‘Jell-O’) pa un hende na cas, cu no por a come mas cu cosnan hopi liviano.
El a haya gelatinanan los for di e paki di cuater, kiermen un pa un pa 1 Florin, y el a cumpra cuater, sin puntra su mes di con e prijs aki? Un paki grandi cu cuater chikito den dje ta costando 9 Florin!
Anochi ora e persona a bay habri un di e gelatinanan, cu tabata den frigidaire a ripara cu e tabata completamente daña, smelt y cu un holo stinki, y lamentablemente, mester benta nan afo.
Esaki ta parce un triki cu kizas un ke otro supermercado ta uza ora e tipo di productonan aki vence, pa toch purba bende nan. Tin biaha, por ehemplo den e caso aki, cu e consumidor no por a bay te e supermercado pa reclama ni debolbe e producto pero si mester a bente afo di biaha.
E solamente kier alerta mas consumidor pa paga tino ora un producto, cual cu sea, ta den reki na un prijs hopi mas abao cu normal. Purba wak e fecha di expiracion y si e ta venci no lague pa otro hende bay cune, pero reclama di biaha cerca e cahero of otro trahado. E problema cu e pakinan di gelatina ta cu e fecha ta riba e plastic di un di e cuater pakinan chikito, no den esun cu ta contene e cuater unidadnan. Un hende cu no ta wak mucho bon, of cu no tin su bril di bista cune, no por haya e fecha di expiracion na simple bista.
